2010年4月1日 星期四

好耐冇寫日誌,好多時求其寫落蟹金同其他文度,其實牛皮市真係冇乜好寫

bossini已經除淨,很快可以收到1100蚊股息,因為提左倉,每次收息可慳85蚊手續費,但提倉加未來的存倉的手續費差唔多600,有d偷雞唔到蝕揸米的感覺,當然,自己名的股票感覺是唔同的

買bossini的平均買入價是的0.385,其中有一半錢是貸款,套左息之餘又賺左價,開始有點食髓知味的感覺,7月還清時睇下還借唔借先

匯豐收息的信到左,我會揀以股代息,仲有我恢復月供匯豐--只供3個月,現有1412股,打算以後整到齊頭1600股

味皇現在恢復返6日工,人工回到正常水平,返5日6日是可選的,公司方面當然希望所有人揀5日,但味皇認為股市有平貨,此時應該努力儲股息才是,但本年至今,恆指沒有上落,但二線股已升了不少,好似蟹金的淨值本季升左30%就係証明,顯然儲股息的效果失去了大半,現在有點買唔落手的感覺,考慮到經濟好轉,未來賭場必然出現地獄般的工作量,味皇是否應收少幾千轉回5日制呢?

味皇層樓已完成裝修,小整一下,收費15000,裝修其間阿媽搵到人租,租金市價4000蚊葡幣左右,但阿媽3600租左比人,不過是免佣,而且收港紙,由於間屋基本上冇乜電器同傢具,因此暗中慳左唔少,裝修其間租客要趕入伙催催槓,結果要提早完工,裝修效果不是特別理想,但有返租金收入,手頭的資金可以鬆很多

對於股市,我應為牛皮差不多係時候終結了,原因也很易理解,之前股市由10000點升到20000點,一線股升幅巨大,估值回到幾高的水平,因此二線股的吸引力相對增加,之後市場先生開始不買一線股而轉買二線股,因此恆指牛皮,非成份股升,現在多數二線股的吸引力已大不如前了,市場先生遲早會轉回買返一線股,牛皮就到此為止,一線二線一線二線咁遁環直至爆煲

好股不易搵,又好又平更難搵,煙頭投資法漸漸失效,但也不是完全冇煙頭的,比如震雄同鴻興都是特別長的,但似乎市場的焦點很快就不再落在估值上,而是在盈利增長上,到時味皇可能不得不轉換策略了

沒有留言:

張貼留言