阿福落難記

"阿福"泛指福記的股東,係繼第一天然的"水魚"同中國包裝的"飯桶"之後的最新族群,味皇作為"水魚"的小頭目,非常歡迎阿福們加入成為我們去死去死團的一份子,創造新的苦主文化

對於誤信財演而買入福記的股民,味皇深表同情,除左同情外,仲可以點...

有睇開我blog的讀者,都應知道我係第一天然度踩左蕉皮,教訓非常慘痛,直到今年我好唔容易先扳回損失,作為教訓的總結,我先下決心做核數師研究,將教訓公開

第一天然的核數師是非四大的陳葉馮,一個值得記住的名字,而今次的福記,核數師亦是陳葉馮(會計師行研究-13)

可以發現發行債券的中國特色民企是幾普遍的,難得福記有咁多同鄉好兄弟,連財困都一齊傳,咁齊齊落油鍋囉

如果有認真看待味皇的教訓,起碼你唔會做福頭

除左核數師外,連董事也是老熟人了,第一天然,北泰等爆煲股同福記的另一個共通點是大部份股份押左比證券行,福記是在今年5月12號將股份押比證券行,11號福記有47.25%的股份存係金融機構,而12號卻是83.28%,肯定有問題,多出的全部都押在大和國泰證券(大和國泰大量持股的仲有安德利,大賀,東江環保等),有幾個月時間,小股東要走有幾難(http://webb-site.com/ccass/choldings.asp?bday=12&bmonth=5&byear=2009&hide=&sort=holddn&issue=4545)

現時陳葉馮的合夥人兼任廉價公署的官員,無論是否適合,都不會影響香港的金融中心地位,因為香港唔會出現安達信一樣的案件,一來冇咁大單,福記只是區區市值幾十億的案件,二來查唔查都成問題,內地民企山高皇帝遠,查小型目標比如東大照明,會浪費警力,查大型對象比如是德勤咁,香港亦冇人手處理,因此不調查不監管,市場先能保持平穩和諧發展