本土三連

呢度講3純本土地底泥

2682潤利海事   今日股價0.162   淨值0.21  市值1.6億

先聲明一下,潤利的保薦人極為垃圾,18年上市,味皇對佢完全冇興趣,係新股列表度諗都唔駛諗就直接劃紅線,現在味皇能對佢重燃興趣是因為佢市值有夠低同有洗底行為,另外更主要的原因是現在味皇叫有點錢可以浪,如果仲係10年前的窮苦青年味皇先不會買佢

味皇發現,佢比保薦人呃左,跣左鑊甘的

內容係咁,佢最初的招股書寫,定價0.5-0.6,當0.55好了,到時的市值是5.5億,淨值0.17,佣金3900萬,集資淨額約1億,佢會用5200萬買船,3200萬買碼頭,1200萬請人咁

但後來徹回上市,半年後再上過

而第二版招股書寫,定價0.5-0.6,當0.55好了,到時的市值是5.5億,淨值0.16,佣金3900萬,集資淨額約7400萬,佢會用4800萬買船,2200萬買碼頭,400萬請人咁

差別在於乜野呢?第一版,公司理解為比左3900萬佣之後,仲有1億用,抽佣28%,而第二版經紀同佢講,比左3900萬用,剩7400萬用,抽佣35%

當中有冇炒大鑊?有冇家變?不得而知,最終上市後第一份年報寫,得6600萬用

7400萬抽3900萬佣,經紀賺過半,相比起普巴8900萬抽4100萬佣,潤利比水魚聯還水魚(漫/鰻聯),當然,也不排除有回佣

味皇在生活中也有類似經驗,當年賣樓C的時候,同經紀講好賣到價錢以上可以比兩個佣冇就一個,最後樓只C賣到價錢以下,去到律師樓經紀也斗膽問味皇要兩個佣,以前講的經紀不算,那個只是兼職類似的,媽媽的不良經紀

味皇問過湯財,潤利的保薦人就是莊友堅

回到潤利本身,你走去維港海邊,一定會見到佢的船,佢主要係租船出去,同車行租的士一樣,可以理解為水上的士,三跑外面走私的也可能有佢的船,另一樣係佢同污水廠運污泥去堆填區,如果粵海賣東江水叫公用股,咁同污水廠運泥也是公用股,還有的就是拖走珍寶海鮮舫,澳門同維港煙花匯的放火平台之類都係佢做的

佢上市後買左D新船同二手船,例如佢最大的船坪洲街渡A5423咁,1989年的船,折舊後的資產淨值應該不高,但租返出去應該回報都唔差,保養得當船比的士耐用得多

總體而言味皇認為佢在性質上具穩定性,現金流不算差,冇乜債,也派了息,係折舊比較重,而股價已跌成渣

1737亞洲實業   今日股價0.245   淨值0.22  市值2.5億

就是赤臘角機場地勤啦,由於佢基本冇欠債,所以是國泰之類的上位替代

又係莊友堅

發售價0.48,集資淨額9500萬,抽佣2400萬,同上面相差好遠

佢集資用途有一半係係屯門買倉庫,現家由於疫情關係,個計劃停左,佢原先計劃集資外仲會借大筆錢買屯門倉庫,佢擴張計劃停止左,冇資金需求所以現家有派息,但一旦疫情完左,佢開始駛錢的話,就可能冇乜派息了,另一方面佢同莊友堅有關,但凡間公司借大錢,當中就可能存在財技操作,對小股東具有危險性,當然三跑擴建,屯門路通,機場地勤買屯門倉庫也是合理理由,又唔可以話一定有貓餌

機場地勤,倉庫管理,在正確的時候是很穩定的收入

折舊很高,炒咁D人,還了些債,股價同樣跌成渣

莊友堅可能算細雞食細米

6083環宇物流   今日股價0.435   淨值0.23  市值2.2億

類似大昌行,gogovan咁,本地的貨車同倉庫

創業板轉上主板的,應該算老屎忽

2019年應該租左好多倉庫,計入使用權資產,睇佢3年就折到0咁的走勢,似乎是3年租約,仲剩1年

折舊勁高,現金流超勁,仲還左些債,最近3年都有派息,仲派得幾豪下

使用權資產每年折幾千萬,令盈利數字唔好睇,卻有錢特別派息,由於可能仲剩1年約,因此巨大的現金流同巨大的派息可能只剩1年

反正有錢,到時再續租就是了,如果可行的話,但也有可能到時已經冇咁多荀盤,就好似早幾年港通的大老山隧道到期咁,要面對搵到同搵唔到代替品的問題

如果回到2018年的水平,市值2.2億不算貴也不算平,但以今明兩年的水平則不算貴,能維持到的話就算平

3隻當中呢隻算最普通