2020年5月18日 星期一

買入齊魯高速

3.68-3.74之間賣出左19000股越秀,1.67-1.71之間買入60000股齊魯,這段時間一點一點的把越秀換成了普星,大悅城同齊魯,原本越秀有近12萬股的,現在只剩8萬股,其中一個原因係味皇對白馬大廈的將來不太樂觀,租客抗議1件事,製衣業退出大陸2件事,最後係尼日利亞的成衣商人係廣州訓街,冇客,冇訂單,冇黑人,白馬大廈果邊唔轉型未必可以租得滿
至於越秀換齊魯的原因係,表面上派息雖然差距未算非常大,但齊魯的前景還是好億點點的,而且,越秀除左淨,而齊魯成10厘息仲未除淨,咁差價就大了
天氣開始變熱,飲野解渴消暑,有檸檬汁,提子汁,石榴汁,飲支果汁先生,飲起來味道怪怪的,拿起來細看,男汁先生是也,果汁男汁都係咁上下啫,凡是差不多就好了,何必太認真呢?股票很多看起來差唔多,但真際差好多,魚目混珠,你才是魚目,你全家都是魚目...那麼味皇不買真珠,買魚目好了,公路股來很多都弄得好像真珠一樣,於是味皇去找看起來最像魚目的買好了
CTM可以收到幾萬息,有打算再入些少CTM,但味皇手上已差不多成百萬CTM了,佔投資組合接近1/4,太集中唔知會唔會太好,聽說CTM係澳門唯一的固網競爭對手Mtel財困就執粒了,開張到執粒咁多年都未能將網線鋪到味皇屋企樓下,枉自稱99%覆蓋率,想幫襯都冇得幫,現有的網線資產同CTM重覆,CTM如果行使政治任務收購佢,等於只收購客戶合約,廢棄舊網線,如果命令中國電信收購,等於叫中國電信跳坑,味皇覺得最後會係政府接管,大西洋同中銀先唔記壞賬,之後拍賣資產,價低者得
講下市況,味皇覺得近期最重大的消息唔係利豐,而係bossini賣盤,先得4700萬,老闆意興闌珊先唔講,咁代表香港的殼價己不值錢,一定程度上甚至可以當成是負資產,維持上市地位成本每年都過千萬,主板殼唔值錢,更加代表創業版殼已全無價值,無論主板定創業版都會爆發退市潮,究其原因,無非係港交所每年都批幾十百隻老千股落黎,股票太多,資金太少,魚缸水總量就是那麼多,但魚缸越來越大,變成水越來越淺,價值投資最好的市場就是香港了,公司唔值錢,又唔抽股息稅增值稅,如果香港真係想活化市場,批債劵上市都好過批老千股上市
之後就係酒店REIT,好似朗廷咁,唔派息,不知不覺1270跌去到0.2PB,咁代表乜野呢?REIT是要抽管理費的,係如資產1%咁,所以REIT普遍會高估資產以收取更高的管理費,而REIT現金流全派息不留現金,所以管理公司多數係收紅股代管理費,假如隻REIT係PB1的話,攤薄就是1%了,通常加些少租後唔會太覺,但假如隻REIT係PB0.5的話,攤薄就是5倍,5%了,要增長5%也許不是很難,但能增長5%也不過是扯平而已,況且還不派息,大折讓持續多幾年就很不化算,REIT折讓越大越不著數,起始成本低,但持有成本高,當然味皇認為想賺錢起始成本低至關重要
澳門派3000蚊消費劵,之後還會再加5000,因為消費劵跟身份証,味皇估計消費劵會變成長期政策,第日政府派錢的一部分可能會變消費劵,起碼唔會變賭本同人民幣,不過消費劵有樣唔好,就係全世界加價,例如丁面由8包24.8,變成3.7甚至3.9一包,消費劵持續到10月,咁佢起碼加價到10月,咁佢11月就會減返價?當你對住3.7一包的價錢半年,你多數會睇習慣左個價,到時佢唔減價你都唔多覺,好似睇美斯踢波幾年養大左個胃口,將來出現巴治奧水平的球員你都會覺得冇乜特別咁,澳門活豬批發價39蚊斤,街市賣130蚊斤,味皇只能食殭屍肉了,完了要變殭屍了,聽講糯米可以治殭屍,請老闆不要溝粘米
澳門機場現家泊曬澳航的飛機,仲有幾部看似ATR42同ERJ145的私人飛機,冇其他航空公司,估計其他地方都差唔多,睇一睇票價,睇完嚇一跳,然後得啖笑,現家至6月中,珠海飛海口廈門200蚊,珠海飛西安184蚊,非常想坐,就是坐不了,例如香港飛曼谷,經濟艙人均碳排放183公斤,商務艙人均碳排放414公斤,要燒幾多公斤電油,先可以噴百幾公斤碳?蝕死航空公司
九澳電廠對開填海,就快填滿到機場,海洋花園外面又填海,規模之大味皇未曾見,航道就冇了,仲未水浸怕?

5 則留言:

  1. 四千萬Bossini真係好震撼。。。

    回覆刪除
  2. 越秀派息小左,都想換.支持

    回覆刪除
  3. 味皇兄想請教一下823的管理費是幾多?查了年報多年都冇寫,謝謝你!!!

    回覆刪除
    回覆
    1. 係咁講一講我又睇下,發現左一個現場
      823好似係唯一一隻冇出管理人費用公告的REIT
      823好似係唯一一隻會回購股票的REIT
      823同778比較,778有管理人費用,但冇管理層費用,823冇管理人費用,但有管理層費用
      即係823掛名叫基金,但本質係一間實際直接營運的公司,由現金出糧直接受薪的管理層管理,778就外判比體制外的人管理
      823中期度寫,半年管理層出糧1.75億,當中5400萬係股票,823借錢係市場回購股票,再派比管理層,股數不變所以不存在攤薄,另一方面由於823出錢,等於現金出糧

      刪除
    2. 先感謝味皇兄回覆! fact check過係得823會做回購黎出糧, 其他都係直接印股出俾管理人, 但其實佢用自己錢黎做回購+出糧咪變相都係攤薄?只不過唔係用印股形式,而係用左本身應派俾股東既$, 咁所以咩形式出$其實係咪冇所謂?
      不過823出俾管理層既$睇落唔算多, 778管理人一年既費用都成1.75億, 但個AUM細823 5.5倍, 咁睇黎823都算克制, 冇點玩食$之術??
      2隻黎講邊隻會較合味皇兄你既口味成為到次次優解??

      刪除