收樓

樓C收樓,一如4月時所料,原業主果然使出焦土政策,拆左熱水器,揼爛左房門鎖,整壞油煙機同抽氣扇,連一粒燈都拆走冇剩,最作死佢真係拆左花籠,七傷拳為左損人佢仲自己比錢拆,果然係人間極品,由於事前有所預料,因此味皇沒有發作,不過暴怒的味老母知道後立即前往全程監督前業主搬屋過程,因為味皇同佢講前業主有較大的可能會扑馬桶,最後馬桶在老母眼皮下得以保全,佢交左鎖匙後,原來仲有鎖匙,味皇走後仲上到黎搬野同破壞,油煙機同抽氣扇就係果陣壞的,總體而言,房屋的損毀狀況未到最差預期,可以接受
其實佢硬膠,如果是味皇就事後報警拆花籠,駛鬼自己出錢,果然小學雞卑鄙度不足
講返股市,最近收息股大跌,D人"忽然收息"咁爽拿?話說收息股買親都一定會大手,所以"忽然收息"可能會比買老千股更加重創,大部分人在貪息的時候手損的話,自然會極端批評買股收息是邪道,我想不少聲稱買股收息的人都會有不快經歷,但是像3厘不足的領匯算是收什麼息?如果不是因為價升的話恐怕不會有人去"收息",正式是收息的話,起碼應該比較一下定期,IBOUNS之類同股的優劣,就像今次,就是因為有人將股同債(IBOUNS)進行比較而成的,很多收息股在安全性同利率都不及呢批官債,有人要買債就要先賣股套錢,仲要超額認購佔用資金就更多,如果IBOUNS是每年一度的話,類似事件就會每年一次,今期熱錢的題材係收息所以影響收息股,上年題材係第樣就影響第二類之類,反正熱潮一過又打回原型