10月27

今日股市下跌,但我的持股反而上升,本來今個月想買味丹,話買話買,月頭6毫升到月尾8毫冇買,想買奧普,話買話買,月頭8毫升到月尾1蚊又冇買,現家揸住果少少錢,唔知買乜好,最近仲算有購買欲,但冇左上年的購買衝動

今個月收左味丹股息500,新昌300,奧普2500,匯豐今次收左現金900,比起上年成年都見得多幾多,進展唔錯,希望下年可以做到平均每個月2500

我個租客似乎唔想續租,下個月起要全額供樓,我打算在下次租出前油下佢,又要駛幾千,而且今個月狂比炸蛋炸,喜帖是也,突然又駛多左一筆,應該冇多餘錢投資了,不過去比100次禮金都遠比送1次帛金好

9月22時以4.25賣出13000股中銀,再以5.18換入10000股中信銀行,中間套現左3千幾,換馬理由是味皇認為中銀比中信高估左26%,今日中信銀行報6.03,中銀報4.56,如果將中信換回中銀,可以換返13000股之餘,仲有錢剩添,証明今次換股是~~成功的(開心大發現的口氣),順便一提,今日中銀依然比中信高估16%

而中信銀行出左第3季業績,情況唔錯,季賺43億,全年應該賺到170億或每股0.43人仔,如果派息比率35%就會派0.15,而補水同股息稅互相抵消

其客戶貸款上升49%,客戶存款上升27%,以比率來看並不謹慎,不過中信的資本充足率是6行中最高的,甚至是嫌多的,因此過度貸款可以接受,以量來看又如何?客戶貸款上升3300億,客戶存款上升2500億,只是多貸800億而已,以中信的規模來說,不算大數目,而且淨息差由上年第三季的2.31%回升至2.61%,因此中信並沒有降低標準胡亂放貸,核心資本充足率9.84%,比建行水平仲高,如果中央要銀行集資時,資本充足率高的銀行先可以在真空期間放貸,中信的資產狀況全年都冇走樣,比起中銀好得多,再次証明今次換股是~~成功的(自我陶醉中)