內銀橫向對比

首先聲明,味皇由08年開始已經唔沾手大陸銀行股了,之後也不會沾手,原因係味皇唔信佢地條數,10年過去依然唔信,味皇係一個既正直,又卑鄙的人,想過不少裝假狗的方法,而國人感覺上也好似有用到咁,寫本文的目的只因因為呢10年冇寫呢類題材,於是試下寫,前提姑且條數袋住先,唔係就冇野寫

2016               中行  工行  建行  農行  郵政  交通  招商  光大  中信  民生  青島 天津 鄭州  重慶  盛京  浙商  徽商  甘肅  錦州  中原  廣農  哈爾濱  重慶農村 九台農商
資本充足率%  14.3  14.6  14.9  13.0   11.1  14.0  13.3  10.8   12.0  11.7  12.0  11.9  11.8  11.8  12.0  11.8   13.0     ?     11.6   12.4   ?       12.0     12.7       13.8

字縮到最細都過長,將就下

味皇說明一下,貸款一定係實在的,而現金卻可以虛幻的,比如用牛眼淚同檢查官捽眼,就可以看到國王的財寶,國王說"要有錢",就有錢了

唔計數值不明的兩間,水平最高的建行的14.9%,以佢為標準,各銀行的博命程度如下:

                  中行  工行  建行  農行  郵政  交通  招商  光大  中信  民生  青島 天津 鄭州  重慶  盛京  浙商  徽商  甘肅  錦州  中原  廣農  哈爾濱  重慶農村 九台農商
博命程度% 104   102   100   115    134   106    112   138   124   127   124   125  126   126   124   126   115       ?     128   120     ?       124      117          108
貸款利息%  1.62 2.14  2.01  1.92  1.35   1.65  1.97  1.67  1.49  2.0    2.46  2.18  3.72  2.39   3.0   2.26  2.55   1.84   6.67  2.12  2.11    2.48     2.76       3.13 

建行貪款利息2%左右,最低係郵政儲蓄,最高係錦州,味皇估計低利率的銀行貸款構成為政府貸款同公企業債,高D就加入企業抵押債同按揭,再高的就循環債同信用卡, 最高就加埋貴利,簡單講就係利息低安全性就高,反之亦然

郵政博命程度看似高但貸款構成都係公家野,所以唔算真博命,中行同交通整體極保守,工行農行招商依貸款安全性相應調整投入比例,中信自己借比自己,光大覺得貸款安全下谷到盡,之後的地方銀行私貸的比例就開始多,鄭州銀行呢種貸款構成令人不安,錦州完全係準OT,某D回報高但放款少的銀行可以當佢準備用生命值硬接潛在出現的壞帳

味皇認為風險管理過關的係除鄭州錦州的其他銀行,盛京重慶農村同九台農商有風險意識但貸款成份若干令人不安,味皇覺得佢地有配股的強大動機,所以以下不加入評測

(其實係想寫少D)     

                     中行  工行  建行  農行  郵政  交通  招商  光大  中信  民生  青島 天津  重慶  浙商  徽商  甘肅  中原  廣農  哈爾濱       
成本/收入%  33.8   30.1  30.6  37.3  68.4  38.1   31.0  32.6  30.7  34.0   36.9 31.9  26.4  29.7  27.6  27.3  46.5  35.8    31.9

能夠提高成本效益的方法有兩個:1.提高息差增加先利率.1.收不收白不收的手續費

郵政儲蓄你個奇芭,只做公家貸款不取百姓一針一線(?),其次的係中原,只做工商貸款不做平民生意,34%左右同以上的有中行,農行,交通,民生,青島,廣農,估計係主力做大客貸款,但散戶不多,抽唔到太多信用卡手續費,剩低其他的銀行有好大部分收入係壓搾散仔的手續費

成本高的同成本低的特性唔同,成本高在加減息周期的盈利會增加更多(息差),而貸款年期長收入穩定,成本低的在一般時段會增長較快(手續費加價),而手續費同罰息時多時少,但好似重慶銀行咁27%呢類,可能當地佔有率好高反而冇乜潛力,30%左右的就可能仲有D滲透機會,另外,成本低銀行例如手續費同淨利息5050咁比例,佢博老命放款比如增加一半貸款,盈利會變成7550共125,放款=種田,種幾多出幾多,手續費=打獵,有冇要睇運,成本高銀行例如手續費同淨利息8020咁比例,佢博老命放款增加一半貸款,盈利會變成12020共140

                     中行  工行  建行  農行  郵政  交通  招商  光大  中信  民生  青島 天津  中原  廣農  哈爾濱       
成本/收入%  33.8   30.1  30.6  37.3  68.4  38.1   31.0  32.6  30.7  34.0   36.9 31.9  46.5  35.8    31.9
博命程度%   104   102   100   115    134   106    112   138   124   127   124   125    120     ?       124     

如果以建行的125%程度加碼為安全極限,中行同交行的潛力最大,其次係工建農,如果中央放鬆貸款限制,佢地得益最大,其他銀行得益較細,由於工行建行的利息在2%以上,因此到時賺最多   

                     中行  工行  建行  農行  郵政  交通  招商  光大  中信  民生  青島 天津   重慶  浙商  徽商   哈爾濱     
淨值              5.0    5.9    7.0     4.3     4.8    8.6   17.8   5.3    7.9    10.2    4.9    7.7    8.5    4.2    4.6       3.7
PB                0.89  1.19  1.21   1.07  1.03   0.76  1.95  0.80  0.77   0.84  1.37  0.64  0.80 1.11  0.92      0.64
PE                 7.4    8.2    8.2     7.4    7.9     6.5   12.6    6.0    6.4    5.9    11.6   5.7    5.4    7.0   6.2       5.0
派息%            4.3    3.8    3.8     4.3   1.7     4.8     2.4     2.7   4.0     3.8    3.4     4.6    4.9    4.1   1.6       0
成本/收入%   33.8  30.1  30.6  37.3  68.4   38.1   31.0  32.6  30.7  34.0   36.9   31.9  26.4  29.7  27.6   31.9

呢度抽起左新上市的,冇即食的報表費事另外搵

所謂高成長的幾隻低成本又高博命的,能有多少成長具不穩定性,不過全員都在同一條地平線上,就咁睇重慶同天津銀行係呢批中最高息低估值,計埋成本低呢點就重慶銀行最好,哈爾濱銀行有D似天津銀行,可能都會派相若的息,但講成本贏不到重慶,民生也很好,但光芒比重慶天津淹蓋,中高成本的銀行以交行最高息同最平,光大估值看似一樣低但派息少,可能準備緊睇暗病的錢,而且光大博命程度134%會死人,因此只有106%的交通係最佳選擇,中低成本的銀行,工行建行估值同水平,工行貸款利率高D做多D信用卡,建行就放款稍為留力,其實是但一隻都一樣結果,中信估值看似比工建平,但佢利息低兼借到盡,因此潛在能力不比工建好,其他銀行相對都是次級選擇

味皇最終評價,現價是:  交通>重慶>工商=建設=民生>農行=中信

增持招商局

新年之前以18.2的價錢買左一手招商局,當係405的派息提前使用咁啦,本來味皇屬意的係想7蚊左右買美蘭機場,不過果幾日佢上落超快,結果買唔到退而求其次買招商局

係3萬點創52週低位的股票,好多都唔係差的

日元升左好多,同樣人民幣之類外幣都升,應該話係美元下跌,咁樣菲律賓紙同印尼盾之類9成都會升,似乎有D股會受惠

澳門樓市出左辣椒,抽多5-10%稅,雖然同時增加按揭成數,但你有筆錢時,能用的項目已經少好多,但係,味皇問過銀行,車位陰陰濕濕咁改左同樓一樣評估法冇人知,即係車位可以借30年,一兩厘,冇限購,外地人都唔駛抽稅,借到7成,銀行為左做生意已經喪心病狂了,雖然味皇歡迎呢點

AMD出左新U,味皇都想砌返部,不過RAM太貴唔買住,而因為礦難關係,RAM價呢排插水,呢個星期8G由700幾睇住佢插到得500幾,可能係新年促銷,也可能不是(笑)

大致想咁砌

https://item.taobao.com/item.htm?spm=a230r.1.14.30.b1916acaAfIjPf&id=564826632365&ns=1&abbucket=9#detail

2200G價錢同2400G價錢差一倍,現時只有2200G有性價比

https://detail.tmall.com/item.htm?spm=a230r.1.14.9.5f5253fb5ZWAF9&id=549371361271&cm_id=140105335569ed55e27b&abbucket=9

ITX細板

https://item.taobao.com/item.htm?spm=a230r.1.14.18.2c6b7233lcpUGJ&id=549151956396&ns=1&abbucket=9#detail

好可能係掘礦機拆出黎的,主要貪佢係3星粒,超上2900以上應該冇問題?如果怕可以買其他

https://item.taobao.com/item.htm?spm=a230r.1.14.18.6cae2de8K6oR5R&id=42600805571&ns=1&abbucket=9#detail

有reset制,有reset制,有reset制,重要野重複3次

關連性

丘比特幣大跌，如果味皇現家跳出黎說三道四的話，一定比人噴到一面屁，馬後炮，言之不可予也之類的

不過，咁啱味皇姑且有舊文，內容就不再重複了

http://realblog.zkiz.com/lgaim/54786

但今日的內容唔係佢，例如港珠澳橋開始起時，味皇同有c+車的朋友講不如買個兩地牌啦，因為當時香港深圳牌140萬而澳門珠海牌70萬，一通車就會變成港澳廣東牌而同價，不過味皇的提議結果停留在吹水上面

今次膠幣又有乜關聯事件呢，梗係沽空顯卡廠啦，amd今個月出新apu未必會比ati拖死，但nvidia就死梗，礦工只係觀望一下都已經影響銷量，何況礦難，味皇上年買的聯想手機有6+128，因為RAM貴，今日買居然比當時買得仲貴，舊手機升值前所未有，如果顯卡產量下降，內存產能就會由gddr轉回DDR 4,到時裝機同出手機就平返，三星就賺少好多了

試驗性質，本文係用聯想手機寫的，驗證超麻煩，另外味皇有打算買翻身農企準備發布的apu，不過現家嫌RAM貴，現家用緊a10_6790k,其實再戰3年都得嘅,仲揤牙膏的話(呢d內容it狗先明)

又回到港珠澳大橋了，無論三星定nvidia,都唔係味皇掂到的項目，味皇想講的係講股，大橋通車後，有乜股票得益大呢？得益派唔知道，仆街派就睇到，睇人仆街最開心，通車的話，船會賺少左，最起碼夜航坐地起價，典解唔搭夜車？咁就賺少左，坐船去機場距離仲短燒少d油收貴100，典解唔坐機場車？咁又賺少左，呀係邊隻股票行船呢？另，船少左，碼頭就少人用，碼頭的鋪位就少人幫襯，好大機會會減租，呀邊隻股票係附近收租呢？

再次比較下惠記同路勁

今日路勁升到15個幾,同佢18蚊的淨值已相差不遠,PB0.85,雖比唔起管理費騙子,但相比起越秀瑞安保利呢D,已經跑出了不少,唔係大明星,但姑且有出鏡率,同4年前味皇開始留意時已經不可同日而語,如果管理費騙子係山齊士呢D超神水FISH價,路勁起碼都叫係馬達呢D,放出黎有人用正常價接高汁唔怕牙痛

路勁現家已經公認為地產股,而非幾年前的公路股

由於路勁公認為地產股,當路勁名氣越來越大,老母亦遲早會比人當成地產股

路勁市值114億,淨值135億,質地為財政不算太差亦不叫很好但存貨有點多但收租量少的品種,同首創及保利係相同的類型,特別係同首創置業係同一水準的地產股,咁啱PB也差不多,現時路勁息率4.5%,下期當然會加啦,就咁計住先

惠記有41%路勁,55%利基,現時市值為50億,淨值計58億,現時惠記市值33億

惠記只有合併利基的資產負債表,而沒有合併路勁的資產負債表,利基8.2億現金3.7億債,惠記9.9億現金9.9億債,即母公司自身現金1.7億,負債6.2億,唔計路勁加權5.8億現金8.1億債,惠記有礦場之類有價值但拖盈利後腳的資產,仲有可能值一兩億的REIT,由於路勁比幾年前強化了太多,因此相比起黎呢D都變成少數目

第一,現時惠記PB0.56,特別係佢用聯營公司的股價入帳,上一期出業績時路勁PB冇現家咁高啦,就當用現家個價計都過50億,如按淨值58億計,折上折PB為0.49,不過冇人大聲日日天光就啼就唔會有人理,咁惠記PB0.56,而路勁PB0.85,折扣得6成半,一般母公司平時都有起碼7成掛?當路勁名氣進一步增強,PB去到1,咁多少會有人覺得唔抵買而轉買其他,多人轉移視線時,惠記也有機會因此忽然地產,是日淨值5%水位為3毫7仙半

第二,惠記息率4.7%而路勁4.5%,向來D人貪路勁派息遠高於惠記呢個買點,最近已經唔成立了,所以總會有D度縮路勁股東換馬成惠記,如果路勁不向下,惠記就要上方修正4.5%,是日股價水位1毫9

最後就係關於收割了,味皇已經買左惠記好幾年,收左幾年高息,但今時今日的惠記可以維持大增長,但也派不出好多厘,而且PB也0.6咁滯就快比一D出名地產股仲高,惠記公路的穩定性是可取的但也有個限度,過埋業績期後如果惠記PB同派息比起其他股冇明顯的優勢,就值得換馬

路勁股價同近期名氣相對比較高,換馬方案就簡單D,當路勁股價業績後PB上升到比首創呢D高,派息又比首創低時,就換馬首創同越秀交通,比例7:3,而惠記由於好難有咁高估值,因此換馬的要求更高更難,不過大致就係73或者64的比例換成中高派息的成長股&高派息的穩定股或中低派息的成長股&超高派息的穩定股咁組合

類似佳寧娜的情況

佢尋日出左通告http://202.171.253.71/www.hkexnews.hk/listedco/listconews/SEHK/2018/0125/LTN20180125709_C.pdf

佳寧娜股價係1蚊以下大折讓,但基本冇乜街貨流通,所以想叫人係市場收大量的貨基本冇乜可能,一般只能用配股,發新股,供股之類飛起小股東的手段先得,市場上仲有好多呢D股,例如惠記咁又係冇成交冇街貨的,今次佳寧娜係配股,每股2.1配售舊股比人,會唔會先舊後新就不得而知

今次的案例佳寧娜,假設其管理層唔係馬介休系列,而係縮骨的味皇,咁味皇可以通過呢種手段做到乜?

佳寧娜淨值2.7幾,配售價2.1都係有折讓,味皇咁配售比人,必須要係第度收返成本以上的金額

1.最近10年,佳寧娜股價從來冇高過2.1,因此任何蟹都可以係2.1的價錢賣出賺錢,所以好大機會會賣

2.最近幾年內,佳寧娜股價從來冇高過1蚊,當時買落的人今日聽日後日大後日賣出都可以係市價賣出賺錢,所以好大機會會賣

3.最近幾年外買入的好似味皇呢D怪人,例如味皇平均價係1.15咁,蟹左幾年都可以係今日市價賣出賺錢,所以好大機會會賣

簡單的講,挷死的街貨會皇新流通,味皇呢個時候可以叫相熟的証劵行大量收貨,以後左右手交

咁點解唔自己直接將舊股存入証劵行?無啦啦實股轉入証劵行,會比人以為按股好卵樣衰的,當然,今次配股的人會把貨存入証劵行,唔係自己名存入去就乜問題都冇

相熟的証劵行收集左街貨,名義上係獨立公眾人宜,萬事OK,嘻嘻

早排佳寧娜以9億賣左大塊地皮蝕賣比三大管理費騙子之首,再使出祖雲達斯特技--分期付款,每半年比1億幾咁啦,所以當期業績立即計曬蝕賣損失,同時資產負債表未有特別大的現金流入,股價多少可以抑制一下兼唔會比人立即逼派息,因此一定程度能減少收集成本同增加散戶賣貨動機,當然,其他賺錢項目都盡量唔好係當期計,拖下先入帳,當佢帳面現金大量積壓時,到時想收收埋就難好多

1億幾大約係每股1毫,每半年淨值會有1亳轉變為現金,現金增加負債減少,同時每年都增加利息收入,9億總數約每股7亳,最終即使得3厘利息,都可以增加每股2仙盈利

淨值2.7,如果2.1真係賣比人就蝕6毫,1.25億股蝕7500萬,市價0.95用2.1接貨蝕1.44億,合計2.2億,(如賣比熟人或左手就只蝕佣金)錢從何來?管理費騙子1年份的付款大約係呢個數,係度出住先啦

9億如果全部當特別息派出,25%街貨就有2.25億流出街,如收到一半就可以減少一半肥水外流,淨值2.7,如最終以今日收市價1.18到2.1之間收集一半街貨,賺到0.9-2.4億淨值,因此佳寧娜目標係收集到8-13%的街貨

同時佳寧娜打算拆散味皇...不對,係分拆味皇茶餐廳出黎,如果係1股佳寧娜配1股茶餐廳,咁首先可以無成本確保8-13%的"公眾持股量",加上之前賣的10%,已經保証了上市的公眾持股量,到時有冇需要手交就另一件事

呢種冇成交的股票,有野分拆出黎,應該都係冇成交,如果分拆出黎比自己的証劵行,成交會多D(起碼多一次賣),而且肥水不落別人田

今次能夠稱為財技的地方,無非係快速氹人放貨出黎,業績期之前盡量收集最多的街貨

當然,馬介休班老屎忽係唔係咁諗就唔知啦,佢事實上連續賣資產,唔係學味皇咁諗假賣真買,而係單純賣賣賣都唔定

超慘

早兩日同人去左泰國玩左幾日

BUT,今日味皇去學電單車,第一堂,就炒左,不但要破財,仲埋受傷添,現代黎講唔係乜大野傷,手腳擦傷事小,但撞崩左門牙,破相不但止,現家算係食唔到野,煮到面都咬唔斷,連飲水都控制唔到流量,平時都唔知隻牙咁重要,古代冇得醫都幾慘,乜心機都冇曬

好彩冇撞到人

*

受傷初日心情非常低落,食唔到野咁,食特唔多,夜晚肚餓,左手受傷冇握力,開水樽開唔到,攞個碗都攞唔郁,呢個程度仲未去到需要介護的程度,但已經屬於生活質量相當低下的情況,如果呢個時候一個人生活會好唔掂,好彩味皇同屋企人同居,但世界上傷得比味皇重的獨居者大有人在

受傷當晚訓唔著,朝早仲好地地的一部分,幾個鐘之後就冇左,異樣感,空腹感,無力感,重複想像炒車的情況,呢樣同D人某日唔見左隻手,唔見左個腎,唔見左塊包皮(誤)應該係類似的,此時味重開始明白抑鬱症的人的心情係點的,由於味皇的傷姑且叫有錢能夠醫好,因此唔會無限期的抑鬱落去,但世界上傷得比味皇重的無限期傷殘者大有人在

味皇好快會去睇醫生,而且應該比較快醫好,而醫好左9成就會冇左件事,趁仲記得呢種感覺同呢種心情,特此記錄

*

由於澳門醫牙超貴,而且技術應該比較落後?所以出左去拱北整,咁全家人都係客仔了,用人仔5千幾整兩隻牙套,每粒1000-4200不等,味皇選了中價的,現家用AB膠痴左粒臨時牙,姑且能用,不個成個朗拿甸奴咁,正式版需時一個星期先整好,現家總算正常飲到水,咬野今日仲未得但起碼好過之前

不出所料,心情已經平伏,好了的傷疤忘了痛,好快就乜都唔記得

但向往獨立生活的味皇,已經不確定一個人生活係好係壞

食評

收到3間公司的食品,除佳寧娜係頹裝外,周黑鴨同嘉士利都有自己獨自的包裝,佳寧娜的係曲奇,夠膽死賣丹麥屋的1.5倍價錢,事實上係冇乜人買的,仲頹裝,周黑鴨買左豆腐乾同鴨脾,嘉士利就買左D雜餅

https://detail.tmall.com/item.htm?id=546491111658&spm=a1z09.2.0.0.7603154blxLwH7&_u=9ltuodd6f1c

由湖北寄到黎澳門,同佢開埋包,個冰袋仲有少少凍如果運送的不是豆腐而係大閘蟹的話,我估到手時應該未變臭蟹,包裝超高級!

味皇重申一次,周黑鴨的毛利率有成75%,除賣白粉以外應該得做雞鴨先咁暴利,包裝費濕濕碎

成份表顯示,100克入面20.2%係蛋白質,即係豆腐主體,14.3%係碳水化合物,即係糖啦,12.5%係肥油,即係調味由1份糖1份油的比例制成,其他53%大半係水掛

豆腐乾相當硬,外形同網上圖片相差...比較遠,入口最初一舊的辣味刺激的位置係吊鐘,到第三舊的時候辣味轉移到舌尖,而且變成麻辣,唔算好辣,食完冇出汗冇出鼻水,過程中唔飲水都唔駛死的程度,總體而言味皇認為不難食,但也不覺得有乜咁好食,不過食呢個豆腐乾可以作為面部肌肉的地獄特訓,食完你塊面就好似刃牙入面D人物咁

題外話,味皇係無鍚食過津津的鹵豆乾同素火腿,好食過佢好多,而且又比較平,後來網上都買過添食

性價比,1毫子兌1.26克,簡化叫1.26

https://detail.tmall.com/item.htm?id=557601005426&spm=a1z09.2.0.0.7603154blxLwH7&_u=9ltuodd8714

https://detail.tmall.com/item.htm?id=528095346189&spm=a1z09.2.0.0.7603154blxLwH7&_u=9ltuodde20b

大陸肉制品,成份入面居然冇寫亞硝酸鹽!咁起碼有50%機會冇亞硝酸鹽先,味皇生涯第一次係大陸肉制品成份表睇唔見亞硝酸鹽

25.3%係蛋白質,糖9.3%,肥油居然得4.8%,隻鴨起左皮仲唔知點樣制過黎去左油,剩或60%係水同骨頭

近鏡對焦唔好,而且白平衡偏白,實物係好深色的

啖啖肉,聞起黎係齋雞粒五香牛肉粒果種味,食起黎就係豬肉乾啦,同辣味豬肉乾99%相似,但會痴牙,同肉乾比較,佢有D骨頭同軟骨你慢慢妹,比肉乾有更多時間妹,舉例說,九制陳皮同酸梅乾,由於酸梅乾有核,可以比你啤路啤路啤路,吾輩不是花京院啦,總之豆乾係40身的話我比佢滿分,賣點唔係味道,係體驗

你睇奶到幾乾淨!

性價比,0.92(肉!)

真空裝豆乾

成份表20.2%係蛋白質,14.3%碳水化合物,12.5%係油,同上面氮氣裝一樣

開包會噴汁,一手食豆腐一手揸CAM相當有難度

同氮氣裝唔同款,比較接近圖片,因為比較薄身,所以入味D,冇咁難咬,叫好食過氮氣裝

性價比1.27

https://detail.tmall.com/item.htm?id=45056716351&spm=a1z09.2.0.0.7603154blxLwH7&_u=9ltuodd786d

佳寧娜非人曲奇

含牙醫推薦美白成份,食之肛探針,AK1,YN,其實就係成份不明啦,三無產品

送到黎比較碎,胡適合宋禮

食落比較脆,唔肥,但超甜,相信起碼20%以上係糖?雖然有6種餅,但食落口味差異很不明顯,總體比丹麥屋好食...都幾多下,但係未至於值果個價錢

性價比0.49 = =;

https://detail.tmall.com/item.htm?id=562970985488&spm=a1z09.2.0.0.7603154blxLwH7&_u=9ltuoddd9e5

嘉士利的芝麻蛋糕,暫時睇只有散裝,半年前味皇見佢網站有其他味的,現家得返芝麻味

成份有蛋白質,即係同左蛋或者奶粉,由於佢含澱粉,所以碳水化合物分唔到佢有幾多糖,教你點分,如果係飲品的話,佢寫幾多碳水化合物就即係有幾多糖,例如陽光檸檬茶寫碳水化合物11.9克,而康師傅茉莉4克,咁即係陽光的糖係康師傅的3倍,加上康師傅的價錢係3.6一樽,所以近來味皇都飲佢

打開充左氮氣的包裝,一陣芝麻糊的氣味....蛋糕有芝麻糊的味...相當微妙難以形容,味皇指表情

食落口,好似食緊吸濕大苯象咁,質地方面,柔軟度超高,但粘結性不足,口感好似奶落生面粉咁乾同散,物理學的說法就係,一般軟面包同蛋糕,係面粉在膠質狀態發大,物體結構是一個整體,中間存在大量獨立氣泡,可以理解為一塊柔軟的海綿,嘉士利的呢個蛋糕,舊粉應該未打到起膠,物體結構不是一個整體,中間存在大量空隙,可以理解為一個柔軟的沙堆,也許有人O,但味皇X,可能係制法問題薄片狀的蛋糕本身唔可能發到太多氣泡,而且每一個面都要灑粉,如果本身一大舊粘結性同彈性就會好好多,追求外觀影響了食感

性價比1.83

https://detail.tmall.com/item.htm?id=557152748475&spm=a1z09.2.0.0.7603154blxLwH7&_u=9ltuodd594a

蔥油餅

碳水化合物72.3克,油14.7克,比上面蛋糕乾身好多啦,連埋蛋白質8.2克,95%以上唔係水,所以一係好硬,一係好脆

標準的蔥油餅啦,好脆,幾好食,不比嘉頓差,油好少,所以會口乾,大約食5塊以上,手指先有比較明顯油漬,冇帶野飲時唔好食

如果餅乾廠整幾十年都整唔出好食的餅不如一頭撞落豆腐度撞死佢

性價比2.53

https://detail.tmall.com/item.htm?id=562699748118&spm=a1z09.2.0.0.7603154blxLwH7&_u=9ltuodd0d05&skuId=3544887237746

一人一口酥,閃卡酥

蛋白質6.8克,碳水化合物54.8克,油35.6克,食閃卡有損健康,同樣乾身,不過佢好肥,同金拱門有得揮,而油脂係軟的,咁佢應該唔會點脆,應該好易散

實物同圖片相符,半個蝴蝶酥,但比蝴蝶酥厚,超易散,超多餅碎,食得出的材料有花生同椰絲,食完1個隻手有D油 ,餅本身顏色淺偏白,代表:1.可能蛋黃用得少或者剩用蛋白,2.可能唔用深色油而改用淺色油例如豬油咁

幾好食嘅,不過之後要掃地,而且食唔乾淨好多碎濕濕

性價比0.63

https://detail.tmall.com/item.htm?id=553544749863&spm=a1z09.2.0.0.7603154blxLwH7&_u=9ltuodd21fe

呢盒贈品

蛋白質3.1克,碳水化合物70.4克,油23.7克,又係超乾身

兩塊曲奇痴埋,痴埋的兩塊曲奇較易甩,兩邊都有果醬,醬厚0.5MM,同包裝圖片有D差距,聲稱青檸味,味皇食落,為無法辨識的味道,口感方面,果醬部分似切片的提子乾咁,曲奇就比較散,食落好多餅碎,較難維持形狀,粉粉地咁,但總體算好食的分類

性價比,由於係贈品,所以用同店的果醬夾餅黎計,1.47

係珠海的萬佳,天虹,沃爾瑪,嘉士利共通可以買到的只有果醬餅,薄脆,舖頭價錢比網上貴1蚊左右,而早餐餅威化餅之類,如果同百貨公司自有品牌有競爭的就通通下架,例如味皇係沃爾瑪買過嘉士利的早餐餅,但沃爾瑪自有的惠宜出左同樣的餅,嘉士利的就下架,現時華潤同沃爾瑪都有自己品牌,至於最好食的蔥油餅,就邊間都買唔到,閃卡酥同蛋糕亦未曾見過

佳寧娜未見過任何地方有得賣,實際上佢的性價比除左摩連奴之外根本唔會有人買

拱北附近有唔少賣周黑鴨的,但隨時冇一間係堅,因為周黑鴨冇係珠海開舖,唔係假的就係轉賣網上的(需留意食用有效期)

最好食同最抵食係鴨脾,因為係肉類,第二名係蔥油餅,抵食夾大件,其他就好似宮雪花咁,唔知點講好,如果蛋鳩..糕有其他味就可以佢第三名

另一樣味皇想講的係,周黑鴨同嘉士利都係地球的敵人,有嚴重的過度包裝傾向,做呢行都係咁上下

題外話,其實係費事開多篇寫得果幾句野,今日味皇由胸圍上實的許豬果度,割鬚棄袍跳落越瘦的曹熊背上,由於兩方都在飛行途中,跳黎跳去跌死冇命賠,價錢分別係2.21同1.6,暫時未知會唔會上賊船而不自知,不過呢次轉換派息將由1800以內上升到4500以上,假如越秀的派息能在今年內跌穿3厘的話,推算到時股價為2.7左右,咁就換馬成其他,到時內房股?不了,應該會換做物流類