2382舜宇光學

舜宇是味皇的好朋友的其中一隻持股,應佢要求作一作分析

佢由高位4.22下跌了25%左右撈底,當結果蟹左,由於我對舜宇當時的價值嚏之以鼻,所以我叫佢舜宇(2.85)換成勝獅(3.0左右.唔多記得,老人痴呆發作)揸一兩年,結果佢換左大半做勝獅短炒左幾日就放,居然比佢賺到接近兩成,後來勝獅跌到最近2蚊上下,再一次証明味皇是個苯蛋(同時都証明佢死好命),至於勝獅的跳水不會影響我原來的觀點,這些方面我頗為硬頸,此為後話;之後好朋友用果筆錢跟我買入鰻魚,結果避開了大跌市(其實係鰻魚的走勢同市場冇乜相關性,當然升市都肯定冇鰻魚份),現在舜宇1.8左右,佢3.15撈底的行動看起來並不成功

咳咳.....入正題了

以3.15計算,市值31.5億,當時公司固定資產3億,淨現金1.6億,有3.5億股東權益,其他全部加埋當有1億,合計9.1億,即係有22.4億的溢價係用於其"盈利能力"上的

佢果年報稱賺1.1億,即係要22年先圍到數?就算其盈利能力升3倍(偉哥?),都要7年,好明顯市場上有大把更好的選擇

現金流表看,04年業務收益1億,05年冇,06年(上市年)2.6億,可以想像為舜宇故事將05年的數到06年先收,推斷其實際"盈利能力"平均1億多少少,04年1億,05年1.2億,06年1.4億,事後諸葛,其07年的收入為確實為1.6億;所以盈利上升3倍的"基本要求"看來比較遙遠(而且仲未扣折舊)

另外關於佢推遲收數令上市年的收入提高的手段令人頗為不爽,因為為應付之前的資金不足,佢向銀行借左2億應急,所以說玩陰謀點都要有個限度

留意佢已繳稅金部分,04年3300萬,05年2300萬,06年冇,有三個可能,1係佢04年賺多多,05年賺少少,06年賺唔到甚至蝕錢;2係佢之前兩年做數,一次過提前交定以後的稅;3係佢03年以前曾蝕大錢,有扣稅額可以係之後隨意使用,佢用晒係05,06年度;又事後諸葛,07年交左800萬,除左果年有稅率減免外,不排除有第3點影響的可能

而且以稅率33%計,04年1億的收入有3300萬稅都算公允,05年1.2億2300萬稅即19%都可以接受....現在08的稅率定為25%,舜宇的免稅應該去到09年,之後3年稅率12.5%再之後收返25%,總之幾百萬的低稅一去不復返

佢04年流動資產比流動負債多10%,05年最多都係60%,06年10%都冇,咁嘅公司好難做生意,呢個係我阜豐得到嘅血的教訓-將所有低過70%的不知名公司一概排除

續上,佢07年的比率奇高,和之前幾年比較實在太異相了,沒有可比性

我的結論係用3.15的價錢買入,蟹是正常的,如果現家用1.8的價錢買呢?資產多過10億了,算是聰明了,但係仍然冇必要為佢出80%的溢價,都係果句,"好明顯市場上有大把更好的選擇"

推介要厚道

時時有人會問味皇有乜好貼士,我一般會推薦匯豐

點解?因為點多少都要有d責任心,我曾向朋友推薦中國消防,結果令朋友一度坐潛水艇,雖然現在解了套,仲有賺,但係自己點都會過意唔去.雖然我對中國消防的未來充滿信心,但是別人的想法未必同我一樣,他的對中國消防的信心等同是對味皇本人的信心,其份量必定和友誼成正比,由於友誼只會小於等於對自己的愛惜,所以他的信心必然小於等於我的信心,而且由於中國消防唔派息,所以在持有的過程中沒有提供足夠的補償,即係進退失據的情況;況且,友誼同股價成比例的下跌,我會相當心痛

所以我學識一樣野,就係對別人一係唔比意見,一係就以為別人保本為大前提作推介,在這前提下,就自自然然擺匯豐上檯;理由係佢嫌賺得少,最多認為味皇無能或者苯,以後唔再問我意見;如果跌左,即使有損失,起碼有息收,可以由自己決定幾時賣(唔甘心賤賣,都可以肯定收n次息就可回本),味皇的目的也算達到

於是我想作一個不太實際的推論:朋友向你推薦的第一隻股唔係匯豐,你就要重新考慮一下朋友對你銀包的態度,仲有要評估佢以後的情報的信任度

避稅教室-慷他人之慨

今次演出者為中人壽,設利得稅33%,稅前利潤800億,問:四川地震,要捐幾多先好?

根據法例,金融公司可以扣除納稅額的1.5%,一般公司3%

即中人壽扣稅額 800x1.5%=12億

因此可以捐12億

捐贈前利潤 800x67%=536

捐贈後利潤 788x67%=528

所以人壽今次捐錢有些少出口術成份,不過即使係咁,做善事都是令人激賞的事(而且將了平保一軍),包括我在內都對中人壽改觀

 

國難當前,仲有大量共同演出者,例如芝麻公司同綠豆公司,芝麻稅前利潤102000.綠豆稅前利潤30500

芝麻扣稅額 102000x3%=3060  

今次芝麻捐2000

捐贈前利潤 102000x67%=68340

捐贈後利潤 100000x73%=73000

 

綠豆扣稅額 30500x3%=915 

今次綠豆捐500

捐贈前利潤 30500x73%=22265

捐贈後利潤 30000x82%=24600

大陸法例有講內資企年收不多過30000的抽18%,100000的27%,以上33%

ps:不過這係08年之前的法例,今年變成點就唔知

避稅教室-廣告

今次演員係低能廣告之父旺旺,設定利得稅率25%,營業額20億,公司稅前毛利2億

早晨大叫一聲旺旺  

旺旺又想買廣告了,有兩個方案:

方案甲:快劍俠少少鬚廣告,由旺旺自己拍番,成本1億,毛利減至1億

方案乙:阿媽好辣啊廣告,由電視台拍,唔駛煩,成本1.2億,毛利減至0.8億

 

方案甲 法例規定,自己做廣告可以有0.5%營業額的扣稅額,即

扣稅額 50x0.0005=0.25億

稅基 2-0.25=1.75億

純利 1-1.75x25%=5625萬

 

方案乙 廣告支出全額扣稅

稅基 2-1.2=0.8億

純利 0.8-0.8x25%=6000萬

避稅教室-甜頭

今次演出者係鰻魚的零售店,公司稅率25%,平民稅率20%,毛利率50%(不含稅),設增值稅17%  (一切按大陸法例)

情況a:鰻魚7折出售

情況b:買夠100蚊送多值30蚊的魚

情況c:買100蚊現金回贈30蚊

 

a:鰻魚7折出售

毛利率50%即100貨成本為50,現在賣70

毛利(含稅) (70-50)/1.17=17.1

利得稅 17.1x25%=4.3

純利 17.1-4.3=12.8

平時見最多的甜點就係打折

 

b:買夠100蚊送多值30蚊的魚

毛利率50%即100蚊魚成本為65,現在賣100送30

送果30係白送,即係個客有賺(收入?),個客要交入息稅,但係冇理由叫個客去交,唯有鰻魚交

d魚要交左稅之後仲值30,支出係30/80%=37.5

其中,入息稅 37.5x20%=7.5

毛利(含稅) (100-65)/1.17=29.9

送果d算白送,冇得扣稅

稅基 (100-50)/1.17=42.7

利得稅 42.7x25%=10.7

純利 22.4-10.7-7.5=11.7

用這方法的一係送d倉底貨,一係送d成本好低的,咁就冇咁傷,有時會改為加幾蚊買多d咁樣

 

c:買100蚊現金回贈30蚊

同上,不過今次送現金

入息稅 (30/80%)x20%=7.5

增值稅 ((100-50)/1.17)x17%=7.3

毛利(含稅) (100-50)/1.17-30-7.5=5.2

稅基 (100-50)/1.17=42.7

利得稅 42.7x25%=10.7

純利 5.2-10.7=-5.5

所以未曾聽過大陸d鋪頭有現金回贈

匯豐第一季

留意佢幾句:

1.英國零售銀行業務的除稅前利潤亦增升。

由於作了大額撥備而不用交稅,可以想像公司有史無前例的資金流入

 

2.各經營地區均錄得理想的存款增長。

北石市件以來,沒有人敢存錢去周身蟻的銀行

 

3.集團雖然要吸納環球銀行及資本市場業務的額外撇減額26億美元，但實際收入的增長仍超越2007年第一季。即使撇除集團本身債務的公允值利潤27億美元之後，仍有餘裕增長。

撇除了27億仲有微增,再加26億減值,即賺錢力上升27-53億之間

 

4.同期的實際支出只有輕微升幅。

未知佢炒幾多人同請幾多人,不過佢炒1個貴人工美國人或者等於請1打平人工大陸人咁計,即暗示匯豐新興市場規模增大很多

 

5.按資本協定二計算的資本比率大致保持於2007年底的水平。

減值32億,佢的資產水平保持平穩,佢的資產一定要有相同比例的提高

 

6.在比較2008年第一季與2007年同季表現之時，應特別注意今年已不再有2007年第一季所錄得的，來自平安保險因當時集資活動而為本集團帶來的7億美元攤薄投資所得收益。

賺錢能力再多7億

 

7.我們作為中國內地最大規模國際銀行。

除了揸打,只有匯豐可以適用"國際"這個字眼

 

至於人人關心的撥備我不太介意,因為如果我係葛霖,我會做得仲加激烈,由於次按是難得的機會,公司作任何數額的撥備稅局都照單全收(平時是不可能的),而且股價的低落對以股代息的股東(包括我和葛霖)會有不平等的優勢,而且可以強力打擊資本不足的競爭對手,及製造一堆平價現金收購機會(同時消滅了換股收購的可能,又打了對手一巴),一石多鳥

更大的問題反而是幾年收唔到稅的美國政府點算,一旦開印刷機,全世界都會衰退

中國消防又升了

中國消防又升番7%,那些發國難財的傢伙看準了四川的救災系統要全面更新吧,殊不知它的生產基地就在四川,現在相信一定處於停產的狀態,今年後半的業績不容樂觀

購買這一類公司股票,我抱著經營者的心態持有,亦希望生產出來的消防車同救傷車派上用埸,但是我一點也沒有打算利用別人的災難發財,今日抱著乘機炒買災難股心態的人,生仔冇屎忽

如果中國消防在災難中被毀滅,我就不得不賣走它改買海灣,現在要等佢出業績先知

另外我之前向中國消防發的查詢e-mail,似乎被無視了