年結之前寫埋今日的交易,0.25出清635000股羚邦,1.2分別入20000股京客隆同50000股國銀,再2.13-4買多34000股齊魯
舊文2230羚邦有提到,味皇認為佢正常6000萬是賺到的,市值應該高過10億,但是今年賺唔到,而且派息好奀,味皇未改變上年的睇法,如果戲院同動漫展可以群聚,會賺多比較多,一來楓林網抄左家佢台灣的營業額大增,另一方面原神令全世界的二次元濃度升高,長遠有幫助,但是現在的盈利同派派息還是好奀,市值10億就是現在的1倍水位,因此只要換馬成同樣有1倍水平的股上,味皇就能說服自己沒有損失
回到組合,頭5個月升值非常順利,但6月就係咁龜縮,現在總值760萬,差一點就比人地定義為磚業投資者,另外還有7萬的在途股息
半年前股本是318萬,今期收左3.5萬日本樓的租,提取左6.5萬的生活費,股本姑且算降為315萬,上年尾組合總值625萬,+145萬,看起來像是是23%多D,但下面寫30%,唔知信邊個好,另外上半年收左21萬息,未計在途部分
同上年6月味皇最艱難時相比,上下相差300萬,300萬夠1個人財務自由了,味皇現家的輕鬆是建立在這一年中多左一個影分身的供養
組合按市值以今日計,順序排行係咁:
CTM 120萬 16%
四環 100萬 13.5%
普星 70萬 10%
路勁 60萬 8%
齊魯 55萬 7.5%
越秀/匯賢 55萬 7.5%
首機 50萬 6.5%
國銀 50萬 6.5%
華南/大悅城 50萬 6.5%
漢國/建業 40萬 5.5%
日照/秦港/池州 30萬 4.5%
仲有其他4隻就算了,大致係咁
今年放左好幾隻飛標,羚邦同快餐帝國都剛好賺1倍,強泰睇到食唔到平手走,遠航還未發作,佳華蟹緊,其他睇中好多隻但冇錢買,3億以下的股如果選得好今年好多都好好搵
相反味皇主打的股就一啖砂糖一啖屎咁,業績有燈有橙,平均都賺嘅
下半年可以期望的係國銀會唔會減少撥備,公路收多3個月路費,普星計足新收購的收入,地產股受惠地鐵通車,數據中心今年入數,港口破天荒派息,路勁惠記的差價拉返開,大致係咁,四環味皇睇唔透,繼續食花生
普星同齊魯應該會係組合的過客,現在負債水平高,沒有將來,在價值實現出黎後就會轉換成更低負債的
同賣羚邦的原理一樣,佢有幾多水位,如果有邊隻下半年水位縮細,搵隻水位比佢多的做下一步,可以做下一步的暫定為青島港,中通信,通號,神冠,筆克,其他以後再搵
巴日:唔駛你次次贏,唔輸中間贏舖大的就夠
味皇主要係連續開中,呢兩年先賺到咁多,因為疫情所有股都跌,所以價值股的高估同低估相對平時易睇,之後可能就是勇氣的問題
主要還是上年7月美蘭機場開始,美蘭味皇2011年開始平均約6蚊買,上年7月起最高升到60,味皇34-59賣出,而現在美蘭只有32,後來味皇回收的錢有一部分,應該有一半嘅,1.65-2.43換入齊魯(+30%),0.58-0.88換入普星(+60%),2.62-2.65換入漢國(+40%),0.82換入四環(+400%),還有那些飛標,其他可能冇乜升跌,如果仲攬住當時如日中天人皆吹奏的美蘭,今日的味皇唔敢叫凍飲
投資是連續的,去到某階段,準備下一步唔係等運到,古乳有暈: 鐵打的營盤流水的兵
組合就講到咁先,之後講下時事,敏感的不說,大陸成年塘水滾塘魚,好多人要死,但居然好多人冇死,已經比特色主義鐵拳打到肝腦塗地,將來經濟再差也未必會比現在嚴重,唔賭就是贏,反而香三巷冇鬼真係等死
貨櫃現家非常缺左一段長時間,西瓜都運唔到出去賣好平,貨櫃之類股仲有航運股炒到好高,就咁,亞洲冇櫃,係咁整供不應求,貨櫃炒高,冇空運冇貨櫃運費炒高,而美洲泊滿櫃堆積如山,因為碼頭有疫情冇人開工,亞洲去的櫃有去冇回,是咁的,貨櫃是耐用品,比你想像還要耐用,現在是把愚公移山反過來,每天多增加一些,如果有日工人動力全開,美洲的櫃重新回到市場,劏都劏唔切,整貨櫃的恐怕幾年都唔會有訂單,貨櫃市場就會崩盤
要工人動力全開,要等疫情散退,理論係咁,但實際唔係,現家對抗疫情的武器是疫苗,可以算是唯一的武器,疫苗未打夠政府唔解封,因為使用武器需要安全的環境,而疫苗總有日會打到100%,咁疫情就會否完結?非也,打完疫苗同疫情完結沒有必然關係,疫情可能還會繼續,而武器打光後沒有新對抗手段,政府會繼續封鎖?味皇認為不會,如果味皇站在政府立場,沒有對抗武器,一味迴避唔會改變情況,就索性乖乖受死,其實是政治藉口冇左,封城等打針,針都打完點說服人再封?可以再研究疫苗MK2,但性質上同之前疫苗是相同的攻擊手段,某技巧第一使用時會隆重其事,但用第二次就求其好多了,正是對聖豆豉用一招攻擊兩次變無效
即是說,美國如果人人都打完疫苗,疫情冇論繼唔繼續,D美國人都要出黎開工,唔同你講道德,其他主要國家出於競爭壓力,未打完都有機會跟開工,因此主要是睇美國幾時打完
