退休10年紀念

10年前的勞動節黃金周,味皇仲記得當時係中場圍住的開苛放式高額投注區度不停同呃分黨入卡,篤到冇停手,明明係禁煙區卻一堆人煲煙,味皇怒氣值MAX,飛完盒牌換牌冇人時同個荷吹水,明明係禁煙區卻一堆人食煙,D客唔守法連公司也唔守法,個荷都話可以唔做都唔想做,味皇忽然屎可忍叔不可忍,就同個荷講我一陣落break就去辭職,落完break返到黎就同個荷講我文左信做最後埋7日就走人,味皇都叫做左10年撲克臉低調的老屎忽,驚呆個荷

當然味皇交完辭職信後溺係廁格入面喊,同埋揸住320萬股票並沒有周圍講

今次想講下10年前同10年後的現家

10年前味皇辭職時揸住320萬股票,年尾結算時有26萬息,勞動節時點持有奧普,美蘭,龍翔,惠記,晨鳴,電腦網,匯賢,春泉,開元,SOHO,貿易通,川河,佳寧娜,匹克,新創建,建業,建滔,新世界百貨,10年後剩低建滔係當時有的,另外建滔味皇辭職後冇耐就14.46賣走左,再買設時已經是2023年用23蚊入

當時的320萬主要來自2014年392萬賣走氹仔二手一房經屋的盈利同轉買唐樓時借盡的銀行按揭,買氹仔二手一房經屋時味皇是新城市花園2房同佢二選一的,都係180萬氹仔二手一房經屋租貴D樓齡新D可以借多D揀左佢,當時佢租近7000新城市租5500,後來賣的時候新城市花園2房460萬而佢只得392萬,因為冇耐前澳門大學搬走左同台灣公關冇得黎澳門,氹仔租務開始走下坡直到現家,當時按味皇火棒的買家做左10年負資產,最高位420萬左右味皇算賣得及時,現時佢租5000新城市租6500,而味皇之後即時用果筆錢買左兩間134萬同165萬的老殘樓,兩間租大概9400左右,比供款多D,借到200幾萬咁樣味皇先有320萬股票(當中200萬按揭),咁樣唔計自住就有100萬樓,320萬股票,40萬日本樓,可以忽略的大陸商場舖,欠200萬,好多人可能覺得少唔夠,但味皇相信可以維持到

10年後果320萬股票,現家係600幾萬,收息40幾萬,10年前買果D股如果不動留到現在,好多都變仙股味皇也化為白骨,所以反復橫跳應該算是味皇成功之道,但得600萬算成功嗎?好多人可能覺得少唔夠,而果600萬的成份是,日本樓賣左埋加入去,2017年將134萬同165萬用172萬同238萬賣走,換成193萬同290萬,其中主要目的係加按,借款到290萬(130+160),其中原來打算放租的290萬(160)後來送左比結婚的家人自用已經唔關味皇事,134萬原來租5000左右的換成193萬租9200,而現在172萬的租4200,193萬的租緊7400,而且都趺破買入價,一男子搞事之後一直走下坡到前年先回升少少,即是說味皇欠銀行130萬,還左幾年現家剩110萬啦,有丁點淨租金收入,其實蝕賣一向冇所謂,更平買就可以,但層唐樓就唔駛旨意賣得出,當時仲有辣椒,再加疫情幾年已經搞到過左賣家可接受的樓齡,只能一直收租,而最近又被抽脂幾十萬買中山樓,大致係咁

講開10年前,味皇仲係30幾歲,打CSO雖然會出冷汗,但係充斥大6的外掛服務器當中仲算係高段位的水平,現在叔叔不行了,皮巢鼻毛白

10年前味皇覺得退左休以後再鬆動D可以周圍去旅行,移民邊度邊度,10年後發現屋企人身體變差,特別係不可描述的幾年後,味皇將來可能邊度都唔駛去

10年前成街金舖地產舖,成街都係人,好似有金執咁,金舖逼走幾十年老舖,10年後都係吉舖,地下踩金就有,幾十年老舖自己執包袱

10年前味皇剛退休每日去不同的店食焗豬,當時新龍記焗豬32蚊,10年後味皇北上食22蚊美團咖哩連凍飲,澳門曾經去過的不同的店大都唔見曬,新龍記未執,焗豬52蚊,而且味皇也不再好肉當時咁閒情周圍試食

10年前味皇青頭仔,老母買菜,同屋企人同枱食飯嫌餸少,10年後屋企人結婚搬左出去,少對筷子餸更少,而菜是味皇出大陸食美團攞淘寶順便買的,另外味皇還是青頭

人係唔同時候諗的東西相當唔同,味皇廿幾歲時想35歲年退休,之後點生活,後來味皇真係35歲退休了,現在正在過的退休生活同廿幾歲時想像的還是有點不同,一方面係味皇變了,另一方面世界也變了,特別是味皇被鐵拳痛打,毒打之後,而實際上呢,幾年成個價值觀變曬的人應該不少

一般而言,同一個人係廿幾歲想像的退休生活,三十幾歲時想像的退休生活,四十幾時歲想像的退休生活,五十幾歲時想像的退休生活(以上皆指未達成的情況),應該差別非常大,如果說有人過著想像中的美滿退休生活,咁佢好大可能是某時點忽然暴富的人,因為有計劃退休的時間跨度很大,過程中會出現很多變數,可能你自己改變,可能環境改變,自己適應環境而跟住改變咁樣,現實通常不如想像中好,味皇近年成日出街見到D人開舖唔駛一個月又執粒,每個月都見到有人人生已完,追夢的過程好同魷魚遊戲,人人都想做李瓜誠,就算最後能生存下來的異能生存體比佢做好李瓜誠都好,實際上現在的李瓜誠也不好過

味皇退休早,過左10年退休時間,以後可能仲有兩三個10年,當佢3次計數啦,味皇係第1個10年已經遇到兩次嚴重打擊,兩次重大決擇,一次直接收皮的危機,一次嚴重打擊係剷除澳門的貴賓廳同埋辣椒,令澳門人口減少令味皇層收租樓長期租唔出要貼錢供,現家都仲受緊影響,另一次係2022年起琥珀能源為首的一堆股比地方政府鐵拳,用歷史文件的理由黎抽水,好多公司要不是被直接征收就是忽然要出錢投資落政府,味皇損失相當大

收皮危機係2019年疫情好多股做唔到生意甚至存亡危機,派息由30萬跌到可能最低得19萬,19萬係唔夠養家的,味皇當時業績期係咁換股,果年最後成功保住27萬的派息,如果果時換股有乜大失誤,味皇現家可能炸緊薯條

重大決擇係退休冇耐,2016年奧普作為收息主力被私有化被迫換其他,如果係最開始就出現大換股失誤,就冇今日味皇,,另一次係19年果次,差唔多成個組合要重新組成,本錢已經變小好多了息又唔夠養家又要供樓,責任重大,兩次味皇都是被逼行動起來,其實還有一次22-23年退出被打拳的投資,數額都好大,但味皇的生活還算穩定,冇之前行獨木橋咁誇張,2016年奧普換成的係CTM,青島港,太古B,現在睇返太古係失敗的其他兩隻成功,失敗率1/3,至少冇大失敗,之後22-23年換入的中石煉化,青島港,CTM,中信,保濟丸,筆克,建滔,衛星,池州港,地勤,拖頭,恩達,四環,唐宮,信德,結果有辣有唔辣,失敗率1/3啦,唔駛嗌阿媽,反正味皇是求不敗而不是求大勝,點換都係伴隨住失敗,可受控範圍就可以,本金越多越安全先可以越有本錢冒險,本少時黎冒險唔係咁推薦,如果要冒險至少要有經驗值到手

但味皇可以好肯定咁講,如果學人買指數股熱門股,味皇死卵左十世,股票唔係越出名越巴閉

靠祖師爺的教唆,味皇先可以係各種突發情況冇乜硬直時間下自己解決問題,但祖師爺的影響力越來越低了,連祖師爺的徒弟也宣布退休,講起黎祖師爺本書就快100年歷史了

味皇上岸已經一段日子,離岸邊越來越遠,隨壽命同行動力的縮減,對金錢的追逐稍為少左,同時代脫節冇梗文也寫少左,趁10年紀念的日子,以後可能多寫下其他題材

其他10年前後

10年前味皇每日係不同的黑社會幫派賭廳開工,10年後沒有黑社會

10年前要澳門100萬人香港1000萬人,10年後澳門有A區香港有3跑

10年前政府發新聞,10年後新聞是政府

10年前係老千炒老千股,10年後官方清算老千自已做老千

10年前人口增加,10年後人口減少

10年前公文袋亂港,10年後懷念公文袋?

10年前可以上街,10年後可以出街

10年前學語文,10年後學八股文

10年前有錢就買債,10年後發債就有錢

10年前電視廣告係補習社美容院,10年後係洗頭水保濟丸

10年前亞視睇鏗鏘集,10年後

10年前報紙日日讚力牆笑力牆,10年後報紙日日拆力牆批斗力牆

10年前銀行係大陸黎收購,10年後銀行係新加坡黎收購

10年前是中國香港製造,10年後中國製造

10年前要不是中央照顧香港,10年後完蛋了

10年前讚馬雲,10年後囚馬雲

10年前成街民工,10年後成街大神

10年前犀利哥,10年後全面脫貧全面小康

10年前要褲子,10年後要面子

10年前發展中國家,10年後發達國家

10年前一邊鬧敵人一邊收敵人捐款,10年後免除盟友債務

10年前專重南方人,10年後全部北方人

10年前是高學歷,10年後是低學歷

10年前要利用,10年後要企邊

10年前是一男子,10年後是老10年的一男子

10年前是副總統,10年後是老人痴呆

10年前掌權的是老男人,10年後掌權的是就入土的男人

10年前是矽谷寫軟件,10年後是硬件寫軟件

10年前是主流人口,10年後是一小撮人

10件前是潛入異已,10年後是排除異已

10年前是復仇者聯盟,10年後是黑雪公主黑人魚

10年前是買選票拉選票,10年後是養選票繁殖選票

10年前講地球村講全球化,10年後要你閉嘴

10年前話反對邪教,10年後話你是邪教

10年前鄙視實業冇人做實業,10年後讚美實業冇人做實業

10年前用把口宣傳愛與和平,10年後用拳頭宣傳愛與和平

10年前講內卷,10年後講躺平

10年前講競爭,10年後講鬥爭

10年前講捐助,10年後講補助

10年前講科學,10年後講捉棋

10年前講分工,10年後講自給

10年前講慣例,10年後講信用

10年前講生產,10年後講存貨

10年前講留學,10年後講遣返