2020年3月14日 星期六

稍作增持

早兩第一次大跌果日0.62賣出130000股佳寧娜,2.02換成40000股第一太平
尋日大奇蹟日0.58賣出剩下的50000股佳寧娜,1.77換成20000股第一太平,收集了好幾年的佳寧娜未收成就賣,覺得非常可惜,但味皇明日也要食飯,飯錢必需確保,2.99賣出匯賢10000股,2.62買入15000股CTM,呢段時間匯賢冇跌過所以換馬,雖然佢出業績後多數跌,但仲有利用價值甩曬又唔好,象徵式換些少,另外0.6買入琥珀能源40000股,惠記係大奇蹟價時想買但買唔到索性唔買,建業同漢國買賣差價太大冇成交,最後選了琥珀能源,當日總共掏左幾萬蚊出黎增持,想買的東西很多,哪有錢你老帽
味皇預計今年的股息會減相當多,買股需要安全邊際,但在此之前,生活費也需要安全邊際,以為財務自由,退休鳥,轉頭又要重返職場就...也不是醜事,馬死落地行,適當的時候做適當的事才是新好男人...話說味皇不旅行壓縮消費的話,仲可以撐幾年而且唔駛減家用,應該足夠撐到完事,但如果用太多儲備買股票的話,可以改善未來,但損害現在,有時你面前會出現一些投資項目好似好好搵,但你投入去,會發現自己越買越窮,帳面值一直增加,但你生活卻越見寒酸,因為資產可以是正數,但現金流卻是負數
味皇重新撿討一下投資組合,正常應該算非常穩當抗逆力特化的組合,但今時今日居然退潮時是裸泳狀態,味皇不去深究邊條友仔強行拉脫味皇的內褲,你急著去追內褲賊只會演變成變態味皇裸跑追男人,因此還不如堂堂正正光著鳥漫步出來,起碼算是光明正大冷酷有風格的變態,反正變態是不能避免
組合中有87成係收租股,港口股,公路股,公用股,現在的情況是,公路冇車行,業主要免租,海港空港冇人用,十幾隻股當中,只有CTM一隻可以雷打不動想食人就食人,不否定現在情況特殊,但如果能多幾隻就最好,味皇想改善一下內褲,下次再緊身一點,不要再被扯掉
一般來說,社會會越見貧富懸殊,人類只要動用腦細胞,貧富差距就會拉闊,現在是腦細胞不重要的時間,但始終都會回歸常態,現在是少有的貧富差距收窄的情況,例如有錢佬財富急降成負數,窮人最多也就是接近0,銀行存款是大量窮人的血淚集合,政府不會保障少數銀行客戶的負債,但姑且政府會想保障多數存戶的存款,死少數有錢人讓大多數窮苦百姓存活,同達爾文病毒一樣,打工仔或許能領到下個月的工資,但老闆可能連明日的太陽也見不到,你能龜下來苟下來,明日之後你的競爭力會相對提高,係"相對"提高,至於業主嘛,基本不在三界五行之中的
如果是究極的打工仔的話,之後會變成眾生的頂點掛,只可惜味皇不是普巴摩連奴,究極體就不追求了,通常打工仔的完全體是公務員,如果股票當中存在公務員股票的話甚為善也
最近油價好似大跌,味皇在油站感受不到,但據說油價真係好似大跌,味皇在油站感受不到,但新聞報導油價真係好似大跌,味皇唯有在油站喜迎油價上漲,由於油價上...油價大跌,味皇覺得電公司會唔會得益呢?於是用30秒大法篩選各電公司,篩剩兩隻,分別是90同816,結果而言兩隻都在油價上得益並不太,減息的效果仲大D,816對明日之後的效果應該不錯,但90味皇冇眼花的話居然睇見有完全體的特性(2015年起),因此選左買佢,就係手頭冇蚊冇辦法買多,不過90的類型似下限高,上限低的品種
股市方面,之前完全係中國武漢肺炎,處理方法無非係壓,埋,同燒,抗體不是在三尺之下的地中就是去了見三尺之上的神明,流入凡間要迂迴很長的路程,現在全球煉蠱,周圍都有樣本,人體實驗邊度都有得做,針拮到肉,之前可能研究幾千人個達文西就算多,現家則全球的文西都團結起來被研究,藥應該好快就出到,現家主要係冇藥醫先存在不確定性,只要有藥,有錢佬就不用怕,當然藥未量產前作對社會用不大,但起碼有錢佬可以自行解決心理同生理需求,即是說有藥為第1階段,量產為第2階段,回升唔會一次過回曬


*早排菲律賓停市之後一日1.35買入20000股第一太平,3.7買入6000股惠記,0.56買入20000股琥珀能源,暫時冇閒錢了,結果第二日第一太平跌到1.1,匯賢跌到媽都唔認得,早知就賣多D,味皇的買入價成日都咁眼冤

8 則留言:

  1. 今次疫情全世界每人都要找數
    睇下係出細細份定大大份

    最重要身體健康
    錢財唯有再搵過 :)

    回覆刪除
  2. 終於搵到味兄個新blog,味兄有無淨現金雪茄屁股推介?
    搵到有1122, 517, 398, 3389,實質可食用數目比較少,有無其它推介?
    就算搵到,但利率太低,其實淨現金也沒有太多著數,有無高見?

    回覆刪除
  3. 支持入左CTM 10000-2.6 (16/03)

    回覆刪除
  4. 味皇過的是修行(苦行)生活.
    財自興否好似無乜關係, 只要履行到角式上的責任已足夠.

    回覆刪除

  5. 味皇賣出匯賢時機一絕...賣出後大跌
    神級操作...

    回覆刪除
  6. 味皇大哥, 除了CTM 仲有邊隻有咁強? 我已買左好多CTM 又想多一隻平衡下, 長建本來係心水但英國利潤管制太嚴重, 謝謝大佬

    回覆刪除