2015年7月21日 星期二

珠海地產

今日放假屎忽痕去左南屏實地考察,呀,係行路,由澳門行路去南屏再行路返黎,日行廿里?卅里?當旅行囉,寫呢篇文時腳仲痛緊
算係叫做行曬珠海疑似有利用價值的地方,咁就寫篇結論
如果買住宅,要分清楚你係用黎住定係用黎擺的,用黎住的話,如果你有車,南屏的樓有最高的居住性,沒有之一,綠化範圍大,有萬佳,係冇娛樂啫,如果冇車就前山>吉大>灣仔>拱北,居住性相對低下,但車就多d而且周圍乜設施都有,用黎擺同收租的就唔好理居住性了,基本上住的越唔舒服的地方就越好,所以要細單位多的地區,實際上充斥著大單位的地方肯定唔會興旺,好多人會忽視呢d常識,用黎擺的樓要升的時候乜垃圾都升,即係打風時豬都會飛咁,由於無限有新樓的情況下冇人想買二手樓,因此“有人接貨機會大“的地方會好d,於是夏灣>前山>拱北>其他,如果收租,夏灣>拱北>前山,具體來說,博升值就舊前山街市周圍同岭秀城呢類樓易出貨,收租就近海關的或暨大門口的細單位
價價投資來說,有幾個地方有水位,暨大門口有楝約30萬一間的蚊型樓,估計空租期極短或者有5厘,之後就d吉大某楝樓底異常地高的樓可以平價買到自製復式,最後就是萬佳同粵海果邊d等拆唐樓點劏都有人租
留意橫琴樓話就話以後計入澳門,於是用澳門價賣又借澳門錢,但現時橫琴是用“房產証“的,並唔係“屋契“,寫好似70年期限,咁到時又點計?
舖位的話,大陸興集中規劃,即係好大一塊商住地唔係9層屋+1層舖,而是9地皮起屋1地皮地舖,偌大的住宅區中間一個大商場,少甚至冇街舖,簡單說就是杜絕競爭圈養管理,養肥大財團趕絕個體戶,商場掂唔掂視乎居民數量而定,同樣地大單位多的地方即死,咁規劃法仲有個唔好處,馬路闊到差唔多可以12線行車,斑馬線又遠,過馬路的成本極大,等於孤立左街舖,呢點係荒山野岭突然大躍進成發展區的地方特別明顯,南屏同橫琴就是呢類,靚係靚,賣完就算冇持續性,比多10年都唔旺,到收稅時又係政府自已玩死自已,街舖最好是雙線行車,兩邊街舖亂過馬路,咁先會旺,買舖買舊香州>夏灣>拱北
寫字樓的話,由於橫琴會有特別的法制,唔清楚橫琴住宅地址可唔可以注冊公司,唔得的話橫琴的商業地址就有特別價值(不是物業本身),寫字樓同舖位的信箱值錢,就好似兩地牌仲費過層樓本身咁,如果係一般寫字樓,舊香州的乙級丙級會好過供應量大的吉大甲級,當中商住兩用就最好,咁嘅野係得電腦城果d同南屏果兩條柱,香州會平d
基本上前山北岭拱北夏灣香州都唔怕中伏,而新香州供應量太大,橫琴太淡,白石同蘭甫定左型重建唔到,幾個都係伏,斗門的話任何方面皆劣於南屏,唐家的話還不如揀中山

沒有留言:

張貼留言