新年換馬

新百貨跌下跌下跌左好多,手上貨又少對組合整體不構成影響,因此0.95沽清,換成0.71佳寧娜同1.41華南城各10000股以睇少1隻,跟住2.95出左8000股春泉換成3.01匯賢7000股,排隊買建業就失敗左,另外早前用雙糧平均26多D買入3手金沙以作紀念

看淡香港係唔係一定要睇好其他地方?又唔係二分法,香港資產有問題唔代表其他地方資產唔會一齊出問題,好似08年大陸仲話8%時味皇就已經唔信內銀條數咁,唔係話香港出事換成大陸股就避到險,何況你要知道大陸係點睇香港的,假設大陸係斯路,佢要升級做完全體就要吸收人造人1718號,而香港就係果個人造人了,大陸吸收左香港,佢就可以借美金同走資移民,如果香港冇自由兌換地位,咁同天津飯有乜分別,吸左都嘔返出黎,如果香港唔係用美元同自由兌換,對大陸就冇利用價值了,求其深圳上海就可以代替,你睇下人造人比杜拉格斯劏左之後斯路發窮惡個樣,所以大陸就算自己唔掂,為維持走資需求都會傾向協助港幣掛美元(寧要鬼子,不要褲子)...要求掛美元而已,至於掛幾錢就冇要求了,味皇早幾年藥房港時提過葡幣主動一次性改掛7就可以解決好多問題一樣原理,現家就係相反,香港有儲備一用完,大陸黎救人之前,港幣兌美元可能會少一截例如9兌1咁,以前的香港絕對唔會比人想像儲備用盡的樣子,但就算10年又好30年又好,現家有左就咁嘅預期

至於澳門,只是跟住天津飯的餃子,香港掂澳門就掂,香港唔掂要搵過個契家佬先得

要避險唔係要換成某貨幣某市場的資產,而是將收入變成全世界超市的午餐肉劵,或者說能換成當地午餐肉的當地收入,郵寄過黎食又好過去食又好,起碼唔怕餓死先,好似味皇每月可換100罐日本午餐肉,三餐午餐肉訓街你都咪話唔爽,換成股票來說,就是買果D賺全世界人錢而不是賺某類型人錢的公司股票,例如航空航運公司,佢賺起點同終點兩地的錢,國際化的就賺到世界錢,不過現家呢類公司的體質愖憂,國際港口就世界各地的錢自己走過黎咁,好似味皇就幾鐘意呢類股了,現正持有美蘭機場,另外新意網其實也是國際港口,名曰--數碼港,其次就係搵D食落肚的公司,最好係窮撚版的,大家食會好過大家樂,冇大家食唯有大家樂囉,好似味皇就幾鐘意呢類股了,現正持有佳寧娜,仲有就係水電交通電訊公司,長江基建係代表,好似味皇就幾鐘意呢類股了,現正持有新創建,至於買唔成的第一太平係呢類之外又食得落肚