負數

國慶節味皇連踩9日,今日先有得休息,賭場依然人山人海,拿綜援黎日日賭的人相對變成小眾了,公司將賭場面積縮小,改建了一些舖位出租,並將之劃出賭場範圍之外,這決定味皇認為非常正確,一黎舖位在賭場範圍內豆釘都入得,二黎中國人犯賤鍾意夾暖,邊度唔人多唔逼夾都唔痴埋去,貪熱鬧喎,旺喎,所以賭場越逼越好,我地乜服務都唔駛,水又唔駛,笑容又唔駛,一樣唔憂做,一樣咁多人黎完又再黎,夠逼就得啦,劉華話:"今時今日咁嘅服務係唔夠嘅",味皇答:"咁你又黎?"

叫完佢地食霸嘛拿之後,又講返錢銀問題,味皇的真實組合終於見紅了,大姨媽黎通常通都是痛苦與快樂並存的,休休褲頭,"大個仔係我",組合要成長,呢種經歷不可少,特別是味皇的投資目標以派息為主,股票長跌不起反而仲著數,本金下跌可以趨向於零,但同時派息卻趨向於無限

話說股市大跌,現在想入貨時,發現甚麼都想買,煩手上錢少,之前股市未咁跌時,味皇可以很容易決定買邊隻優先,現在太難取捨了,自助餐式的煩惱

點樣在牛市中賺錢應該好多人都有心得,點樣在熊市中賺錢是一個希趣的課題,但似乎冇乜人研究,鬼咩,熊市個個都揸現金,邊個仲同你研究

味皇認為,如果熊市是無限延續的話,可行賺錢方法有3種:

1.沽空--大家都知道就不多說了

2.取得派息/私有化套現--當股價下跌時,跌的是股票的變現價格,公司的價值同盈利能力並無影響,如果能將買股視為一種生意,投入本金去獲得公司將來的利益輸出,在有利可圖的回報率下投入(邊有人做生意會想變現價值)

3.低價值轉換為高價值--好像早年外國好興的一隻雞蛋換一部二手車咁,不斷以物易物,桑椹-->洋梅-->草莓-->荔枝-->番荔枝-->菠蘿-->榴槤,在轉換過程中,價錢不變的情況下增加其食用價值

講返今次股災,股價暴跌的原因主要在斬倉潮,睇報紙話有人用地產公司的債券作抵押貸款炒賣,因為債券變垃圾級而價跌,令抵押品唔夠數觸發斬倉潮,如果股價暴跌是基於此原因的話,跌只會一次性的,因為一個人只會被斬一次,債券作抵押亦只有一次,冇人會重複接受該債券抵押,股市大跌亦連帶其他唔關事的人一齊斬倉,因此市場上很多大戶一Q清袋,呢批斬完的人手中冇股,唔會對股市產生負作用,斬乾淨股市就見底,但呢批完左還有冇呢?下一批唔通是銀行債券?銀行債券應該是最後BOSS了,完左就爆機

味皇封塵已久的福建股第一天然可能會復牌,具體情況唔係大睇得明,大致係有人用每股0.5622的價錢入主,即是說復牌後升的可能性存在,味皇有望在熊市中收回一些寶貴的現金,比較矛盾的是味皇認為老千股應該要除牌唔好再返出黎害人,但同時味皇仍很慶幸可以收返些本錢,大淩的小股東唔知有冇呢種心態呢?