2025半年結

由於冇左可以用黎計數的軟件,試算表已經唔就得點用,現家乜都要人手計好麻煩

恆指半年升左4000點或20%,而味皇組合在途股息比較多,唔計在途股息由646萬增至758萬或17%,跑輸大市少少,上半年收左15萬息

(*計少左拿左10萬出黎用,768萬計係19%)

係呢半個月用0.3排隊收左40萬股當年的有名的老千股博耳電力,除左今次博耳之外同埋3月幾次換馬之外,全年味皇冇任何動作,全年僅有的交易分別是

2.45的CTM>2.42的齊魯~~2.4的齊魯>2.29的CTM  

2.19的能投>1.19的國銀

1.84-1.92的衛星>18.3的中海油

9的美蘭>15.5的金沙

0.3的博耳

CTM果度最後又變返CTM唔算數啦,能投2.19>2.7,國銀1.19>1.74呢單就成功的,衛星1.9>2.09,中海油18.3>17.7呢單就失敗的,美蘭果度我一賣就即刻話私有化呢單都失敗,上半年的判斷好壞參半

組合拖後腿的是CTM,中海油,東瑞,齊魯,地產股,同其他貨不多的細股,表現突出的是保濟丸,四環,能投,筆克,國銀,建滔,總數20隻股當中得6隻股價上有表現,派息方面9隻增派,1隻不變,6隻減派,4隻本來就唔派,看來味皇只有選派息股的眼光上才能跑贏大市

現時的世界性的前景不明,手上的股就算升左跌左,要換成其他不也會出現選擇性問題,又肥大又黑暗的天鵝太多令你不能很容易就判斷出現在持有或準備換的股未來的生存情況,以及準備換的股可以優於原來的股幾多,現在採取一動不如一靜的處理,最多賺少D,關心但不介入

現時好像最有前途的是保濟丸同四環

保濟丸派息同盈利激增,但營業額其實沒有點增加,主要係借左錢玩收購而已,盈利上升左但財務質量算是下降左,借錢是有上限的,今次盈利增長是建立在借錢的潛力用掉上,當然要還的話用幾年可以還清,味皇估佢仲有得升,話曬名義上10厘股(味皇自己是廿幾厘股),最終升落去味皇搵乜同類代替品好呢?暫時有兩隻,仲未升的東瑞同埋數據上全面優於保濟丸的康臣,但康臣PB是2.2保濟丸是1.3,所以要更拉近先值得換過去,康臣比保濟丸優勝的地方在於唔借錢

四環變身好像有些成果,自稱啦,如果再買佢係屬於博懵,投機成份更大,同樣玩變身的神冠也不是非常成功

筆克升得多,屬於考慮賣但冇著落先留著的情況,佢前景唔算好但短期仲扮到成長,派息也會加,留著沒有負作用,但講好的話3年後仲掂唔掂幾難講,味皇苦惱於找代替品,下一個代替品可能是珠船,但珠船也有自己的問題,不見得明確比現在的筆克好

同樣國銀最近幾日大升,又出現要不要換的問題,如換回能投算是賺完袋左先,但能投本身也是高位也在考慮中,能投大加派息的概率高,而國銀即使加派息都不是非常高,如果換珠船會用國銀換

CTM已經還左債劵,冇資金壓力,多數加派息,但回升左有點雞肋

最近買的博耳其實也沒有買很多,佢當年上市千人,千左好多錢市值百幾億,後來千返黎的錢又比人千返仲要千到甩褲,已經唔係T back而係C back的形狀,冇比人全裸剝皮本身都已經出奇,正所謂強中自有強中手,一山還有一山高,佢係老千人地係老拜,後來佢陷入波叔個仔咁的無限期還債人生,大陸唔比個人破產呢味野,你睇佢以前的年報或可以睇到一公升的血淚,又或者睇到常道恢弦?過了N年債已經接近還清,人應該變老實,變成黑白的紙片人,現在市值2億

東瑞擴廠照計已經收成期,可是付出太多,收入太少,也不能說非常穩定,只能說有潛力,由於升得較少味皇可能再買

其他同地產有關的股冇眼睇

大概就咁,組合好幾隻想賣唔想賣,下半年世界點變也不明,味皇可以不出手就不出手

香港的前景味皇幾年前舊文己經預測左,反正車公每年都update就不用味皇再講

其他國家只要一男子在,就會好似將軍的國家一樣幸福,人地又唔上網又唔睇國際新聞,好似內衣咁所有信息都要由親信口述傳遞,咁也不能要求佢能有幾博學,天選之人的知識是上天授與的,冇必要知道雞毛蒜皮的事

澳門也失去光明了,主要是在衛星地圖上看會有估計6平方公里的地方會由好多燈光變成北韓咁冇點燈的樣子,沒事兒,反正這是聖意,輪唔到地方政府阿支阿佐,D小商戶同舖主話要掛布額抗議要澳博承擔社會責任,真荒謬,執粒係澳博的意思嗎?不向澳門政府抗議,執粒係澳門的意思嗎?不向XXXXXX,連抗議主體都搞錯,也許是不敢搞真的,實際上社會不是都在引導人們把責任都全推曬落一介商人身上嗎?要習慣,太陽底下無新事

不過一個大區變成北韓一樣基本上係救唔返,一係特登整成軍艦島咁當景點,不過反正放置不管也會變軍艦島,總之澳門的租值會插得快過香港

我們要理解一樣野,通縮緊,而且有人覺得通縮冇野甚至係好事,即是說不用像味皇一樣升值,就算只是不變,都是相對上有錢左,即是"贏"的定義可以降到好低要求,追求往年同樣的目標是過度的

而且現在的世界形勢,大部分是由感情捱動,而不是由利益堆動,預測別人的感情是無意義的(或者是個別幾個人的利益煽動大部分人的感情,咁還不如去預測那幾個人的壽命)

不過應該會有國家做做埋D外國工程收唔到尾數,如果說有乜要迥避就迥避果類公司

實際上勞動人口係咁做只得一餐口糧,事實上就如同奴隸制度,食得少就賺得少,經濟上非常冇效率,也同奴隸主收唔到錢冇錢有關,大概現在係世界性的奴隸食唔飽,地球呢邊咁情況,地球另一邊的奴隸也唔見得食唔飽,果邊的奴隸要生產養活一些不勞動低勞動的流浪人口,所以產量也低,這就是現在情況,如果沒有錢,提高奴隸的幸福感會是較好的方法,具體操作係減少奴隸的選擇權,減少奴隸的比較對象,去除感情變成機械人,這樣反而容易滿足,而不是每日歌唱奴隸的生活有多幸福刺激佢地,不過還食飽才最有效,某坤話一斤米賣了能換成三斤米糠可以餵飽三倍人,食飽的3倍人產能沒有3倍也有1.5倍掛?先讓所有人吃上劣質米,而不是小數人充大頭鬼,咁樣實際D

XG同沃門沒有自主權,所以冇解

由於澳門下年的當舖同桑拿會高度集中,可能會有集團或社團忽然冒起,能不能上市就另一件事,賭本身就唔多掂架啦,但賭的周邊會大洗牌

選股的目標是找能存活的公司,至少可以賺到錢的公司,當然價錢唔可以離譜,中海油,中移動,AT&T,呢類即使不是良解,但可能是正解,夜晚睇唔到路,災難停電冇燈光,充當個北極星也可以

味皇覺得港幣息低過美金咁多問題大D,搞到乜野睇落去都唔長久咁,現家唔係港股好,而係人地爛

比起以往的小作文,味皇今年應該是歷來最高防禦性字眼

3個油站

唔記得之前有冇寫過呢個題目,如果重覆左詐唔知啦

有人話C朗係好有鬥志有有霸氣係天下間最好的男人,如果場上有11個C朗就一定稱霸天下咁樣,"稱"霸天下呢樣就冇乜疑問嘅,但係有冇聽過,一個C朗等波踢,兩個C朗搶波踢,三個C朗冇波踢呢?話曬十二碼唔可以三個人一齊射,實際上C朗係好難服侍的人,比女子同小人仲難搞,這也包括埋C朗的獨立第三方支持者,對直接接觸C朗的甲方同乙方來說只是會產生問題,特別是大量的C朗

趁現在社會暫時還有保持沉默的自由,味皇且隱一些字眼,3個油站的梗圖應該唔少心人睇過,萬惡的猶太人三個聚在一起會避免互相競爭,會開不同的店疊buff,而天龍人三個聚在一起會開三個油站鬥個你死我亡,這也有歷史原因啦,猶太人有很長的間繁殖速度比不上死亡速度,數量少要互相支援,而相對天龍人大量繁殖互相爭奪口糧的時間較多,猶太人看另一個猶太人是潛在同伴,而天龍人看另一個天龍人係潛在敵人,自己問下自己係唔係先

是咁的,以前周街都係貢茶皇茶,現家一間都冇,味皇以前去台灣旅行時,茶里王16蚊一樽(台幣),手山搖紅茶15-20蚊一杯,咁味皇兩樣都會隨機買,廢水要同樽裝價錢比較接近先有競爭力,後來低賤的茶里王20蚊,高貴的廢水40蚊,廢水店就大量執粒了,即是說唔係50嵐同一芳先至叫競爭,同茶里王同麥香其實都叫競爭

曾經賣廢水係閉眼賺的暴利生意,現家則冇人賺到錢,逼死貢茶皇茶的係coco甘杯,而逼死coco甘杯的係蜜雪冰城,咁逼死蜜雪冰城的係乜呢?係趙一鳴,2024年蜜雪冰城賣的檸檬水是3蚊,用美團特價是2.7,而2025年蜜雪冰城賣的檬水美團特價是1.9,因為趙一鳴賣緊2.2的樽裝,這回到以前味皇去台灣旅行時兩樣都可能買的情況,10蚊的茶百道過主啦,咁好似味皇咁的人爆買趙一鳴,係唔係趙一鳴就好賺錢呢,非也,蜜雪冰城(加盟店主)蝕錢,趙一鳴(加盟店主)也是蝕錢,連帶華潤都要陪佢地蝕錢,這是一場沒有贏家的不毛戰爭,看見蜜雪冰城的肥妹店員全黑的面色,看見趙一鳴死魚的收銀哥仔,味皇很是明白很是共情,當年味皇派牌都係冇好面色比賭客,就好似挖洞填洞製造就業一樣,現在已經變成要靠做蝕本生意而成立的新時代創新深化經濟

咁新時代創新深化經濟係點成立的呢,係天龍國也不是新鮮事,例如十幾年前的小黃車果D比你免費用,你用一次佢蝕一次,而佢的目的係按金,佢目的係收收埋埋D按金去放貴利,等於賣會費賣療程卻隨時可以半夜執粒的健身中心美容中心,佢地的目的係預收款,而現家進化左D,例如幾年前美團拼多多果D,係咁貼錢做優惠搶市佔,佢地口講的理論係第逼死競爭者之後加價就可以,實際上目的係蝕股東的錢比消費者,然後做大個市佔,做個將來會賺大錢的形象,然後用曼聯價上市,用新股東的錢做蝕本生意蝕返比舊股東,完成一個循環,比起舊時代的方法好在唔係龐氏,但如果沒有曼聯支持就也是走佬收場,現在的雪冰蜜城同趙一鳴也是對消費者幸福,做大形象,打算靠上市黎回血,同拼多多相比佢資金壓力細D係大形象也能騙到很多痛苦加盟主,不過實際操作下來,蜜雪冰城同趙一鳴都一齊執唔少,呢D叫做共倒,加盟主互相鬥倒,一方面蜜雪冰城上左市也冇需要咁多形象工程,作為加盟主趙一鳴的加盟主應該慘D,除左加盟費仲一定要入幾十萬的存貨,趙一鳴結合了小黃車呃按金同拼多多呃股票的優點,經濟上相當進步

這是拱北埋單17.8的套餐,凍檸,麻婆豆腐,雞扒

這是拱北埋單15的套餐,凍檸,豬扒咖哩面

味皇食周期表的同時,味皇不覺得店主會因為這個價賣了這個餐給客人而得到幸福,但肯定為附近的店主帶來不幸,也為澳門的店主帶來不幸,澳門同香港現家只係大陸的一個普通城市,文化入侵不可避免,腥港淫,伊始卷柿來

有人說東西便宜不好嗎?大家不是喜歡東西使宜嗎?我們總不能幻想進入老人痴呆年齡的大人物從很高的樓梯掉下來撞上咬著油炸鬼的女子高生然後交換身體的劇情上演,放棄幻想,過好每一日,過得一日得一日實際D

面對問題是解決問題的第一步,上面的人連第一步都唔肯踏出,我們唯有當自己係一棵動不了的樹好了,呀~光合作用光合作用

對於侵侵呢種反覆橫跳,以後也會繼續反覆橫跳的人,味皇詐唔知就好,今年以來世界大變,味皇看不清短暫的將來,所以呢幾個月基本什麼都沒有做,那麼和味皇一樣的人應該也很多,看不清要點做就先乜都唔好做,反正你即使做了也看不清做了大概會有乜結果,正是世界變太大變太快搞到大家無所適從,現家就算再加戲也不會調動到大家的情緒

寫在半年結之前,關於味皇的投資組合,呢半年反而升左唔少,但看不清前景下味皇選擇不動不如一靜,沒有進行任何換馬,除淨收到的息,係最近半個月開始排隊一隻曾經百幾億市億現家只剩2億的當年幾有名的老千股,睇唔到前景都係估估下博下,也不是有很多錢買,等半年結時先開名